Silchar kawng dan tumtuten state maxi cab service ti tel lo

An thil phut tih hlawhtlinna atana September 25 zing dar 6.00 atanga Silchar – Aizawl Road kawngpui dan tumtute chuan state chhunga maxi cab service an dang tel dawn lo tih an sawi.
Kolasib District Land Owner’s Association Joint Action Committee thuchhuak chuan, Mizoram sawrkar laka an thil phut tih hlawhtlinna atana National Highway 06 & 306, Silchar – Aizawl Road danpin an tum chungchangah lirthei an dan loh turte an sawi a. Fire & Emergency Service, medical duty, magistrate duty, police leh force dang, school naupang hruai lirthei, damlo phur lirthei eng chi pawh, tui sem, bawnghnute sem, two & three wheelers, Mizoram chhung maxicab service (inter-state maxicab service tel loin), September 25 zanlai dar 12.00 thlenga Silchar lam pan lirthei ruak chhuk thla a huam anga, hemi hnu lama lirthei rua chhuk thla erawh kal phal a ni dawn tawh lo tih a sawi.
Vairengte to Mualkhang inkar kawngpui dunga ram neitu, Kolasib District Land Owners’ Association chuan sawrkara thilphut an neihte tihhlawhtlin a nih loh chuan Sethawn RTP farm-ah September 25 zing dar 6.00 atangin kawngpui an dang ping dawn tih an lo sawi tawh a. An thil phut zingah, ram neitu nihna (ownership of land) hi sawrkarin chingfel rawh se: RRF Notification 1965 hi ram hmasawnna daltu a ni a, thiah ni rawh se; four lane project hi tihhlawhtlin ni rawh se; kum thum chuang hma la thei loa kan ram min khuahkhirh hi sawrkarin sut rawh se, tih te a tel.