Sinead O’Connor thihnaah rinhlelhawm hmu lo

Sinead O’Connor thihnaah rinhlelhawm hmu lo
‘Nothing Compares 2 U’ tih hla larpuitu Sinead O’Connor, kum 56, thihna chhan hi puan a la ni lo a, mahse, a thih danah hian thil rinhlelhawm an hmuh loh thu London police ten an sawi. O’Connor hi South London-a a chenna in-ah nikhaw-hrelova hmuh a ni.
London-a Metropolitan Police te chuan O’Connor thihna chungchanga information thenkhat an tihchhuahah chuan O’Connor hi Nilaini zing lamah a South London-a a chenna inah nikhaw hrelova hmuh a ni a, an hmuhna hmunah hian a thi thu puan nghal a ni. Police te chuan a chhungkhat laina hnai an hrilh hre nghal a, he thihnaah hian thil rinhlelhawm hmuh an neih loh thu an sawi bawk.
Police thuchhuahah chuan, “Nilaini, July ni 26 chawhma lam dar 11.18-ah police koh an ni a SE24 area-ah chenna ina hmeichhe pakhat nikhaw hrelo a awm thu report a ni. Officer ten an buaipui nghal a. Hmeichhe kum 56 mi chu he thil thlenna hmunah hian a thi tih puan nghal a ni,” an ti. O’Connor thihna chhan erawh puan a la ni lo.
July ni 11 khan a Facebook-ah O’Connor hian kum 23 hnuah London-a a kir leh tak post-in, nuam a tih thu te pawh a tarlang a, kumthara tlangzarh turin album a zawh fel thu leh world tour a neih a tum thu te a sawi tel a, US< Europe, New Zealand leh Australia te hrut a tum a ni. A management lam pawhin album leh tour chungchang hi chu an nem nghet tawh a, hei bakah hian 2021-a a memoir 'Rememberings' behchhana film siam tuma rawtna an neih mek thu te pawh an sawi.