Sinner lakah Alcaraz chak

Sinner lakah Alcaraz chak
Tennis big three an tih hun a liam a, tunlai mipa tennis singles huanga inel lian ber chu world number one Carlos Alcaraz leh Italian tlangval Jannik Sinner niin, Inrinni khan Australian Open inbuatsaihna Hyundai Card Super Match exhibition event-ah an intawng a, 7-5, 7-6(8)-in Spaniard Alcaraz a chak.
South Korea khawpui lian Incheon-a mipa tennis player top two inhmachhawn hi an inhnehtawk leh hle a, tun thla January ni 18 atanga khelh tan tur Australian Open-ah pawh inpawt na leh ber tura ngaih an ni a, major title 25 la tling chunga tennis player ropui ber nih tum kal mek Novak Djokovic-a kawng daltu ni leh thei tura ngaih zinga langsar ber pahnih an ni leh bawk!
World number two Sinner laka hnehna a chan hram hnuah Alcaraz chuan player zawng zawngin fans thlawpna an mamawh vek thu leh amah ngei pawhin inkhel entu mipuite lak atanga hmangaihna leh duhsakna dawnga a inhriat chuan a khel tha sawt thin tih a sawi.
Zirtawpni khan press conference-ah Sinner chuan a tuka an inhmachhawn tur chu player pahnih tan inkhel pawimawh a nih thu sawichhuakin, season thara an chim chin tur tarlanna chiang tak a nih tur thu a sawi a, an pahnihin mipui tana hmuhnawm lantir ngei an tum tih a tarlang tel bawk.
Sinner leh Alcaraz hi kum 2024 leh 2025 khan Riyadh khawpuia Six Kings Slam exhibition tournament-ah intum tawhin, tah kha chuan final-ah Italian zawk a chak ve ve a, South Korea lamah erawh Spaniard a chungnung ta zawk a ni.
Melbourne Park-a kum khat chhunga grand slam tournament hmasaber an khelh leh tur Australian Open-ah hian Sinner chu champion lai ni satliah mai loin kumin hi a zawna he title vawi thum a beiseina tur a ni a; Alcaraz-a tan major title a la hlawhchhuah ve loh awmchhun a ni thung.