Sipai laknaah mipui bumin ZPM-in politics-ah an kailut – Congress Thalai

India sawrkar hnuaia sipai hrang hrang lak mekah ZPM sawrkar chuan party politics-a hamthatna umin mipui hnenah thudik tluangtling lo an fah tih Congress Thalai chuan an sawi.
Congress Thalai Hqrs. vice president Ngurdingpuia Pachuau chuan India sipai lakna chu Mizoram hmun hrang hrangah tunhma atanga neih a lo ni tawh thin a, tuna Mizoram tan BSF 300 lak tur chu lawmawm an ti hle tih a sawi. Chutihrualin, chief minister Pu Lalduhoma’n Union Home minister Amit Shah hnena a dil anga a sawi chu thudik lo a ni, tiin, kum 2023 khan Ministry of Home Affairs chuan India ram pum tan BSF constable 3588 lak phalna a pe a. 2024 April-ah Parliament (Lok Sabha) inthlanpui neih a nih avangin hma lak zui theih a ni loa, chumi chhunzawmna chu tuna BSF hnaruak hnawhkhah mek hi a ni tih a sawi.
Mizoram rual hian Meghalaya tan BSF post 300 advertisement a chhuak ve mek a, Meghalaya chief minister chuan a sawi chhuah a ti ve lem lo nia niin a sawi.
Hei bakah hian Sports minister Pu Lalnghinglova Hmar thahnemngaihna zarah sport quata atangin 12 an tlin thu sawi pawh politics tenawm tak, mipui rilru hruaisual tumnaah an ngai tih sawiin, “Sports quata hi a awm ve hrim hrim a nih pawhin Sports minister lo inrawlhna chi a ni lo,” Ngurdingpuia Pachuau hian a ti.
Kumina Lammuala Independence Day lawmnaa chief minister thusawi pawh zahthlak an tih thu a sawi a. ZPM party meeting emaw a ti nia a lan thu sawiin, “Party dang beihna, mahni party fak vakna hi Independence Day-ah an sawi ngai lo,” a ti.