Sipai ram luah a fel lo nuai Mi pahnihin LSC pe kir ve leh

Sipai ram luah a fel lo nuai
Mi pahnihin LSC pe kir ve leh
Aizawl khawpuia sipai ram luahah ram (LSC) nei an awm a, hemi chungchang hi a fel lo nuai niin a lang. Pe kir an awm a, pek kir tum miah lo an awm, court-a kal an awm bawk.
Ningani khan LSC neitu pakhat chuan a LSC hi a pe kir (surrender) a, a hma deuhin pakhatin a pe kir bawk. Chumi hma chuan mi pariatin an lo pe kir tawh. LSC nei hi an vaiin mi 61 an ni a, mi 10-in an pe kir tawh tihna a ni.
LSC nei zinga mi 15 chu Gauhati High Court, Aizawl Bench-ah an zualko a, hearing an nei hnaia an rin thu an sawi.
March ni 24 khan Land Revenue & Settlement department chuan sipai ram luaha ram neite hi insawifiah turin a ti a, ni 30 chhung hun pek an ni.
Insawifiahna thehlut an la awm lo a, an buaipui mek tih thu dawn a ni. Court-a kal mi 15-te chuan an ukil kaihhruaiin insawifiahna tur hi an buaipui mek tih thu dawn a ni bawk.
Sipai ram luaha ram nei, court-a kalte leh mi dang thenkhat chuan an ram neihna hi sipai ram a ni lo tiin an sawi a, sipai ram bul nia sawiin, hun a lo kal a, sipai ram anga ngaih a lo ni ta ringawt zawk niin an sawi.
Sipai ram bula ram nei nia insawite hian an ram hi sipai ram chhung a nih lohzia chu Assam Gazette-ah a chiang an ti a, Assam Gazette-ah sipai ram a nih loh avangin Assam hnuaia District Council hun laiin sorkarin ram hi a pe tiin an sawi.
Sipai ram a ni lo an tih bakah ram hi dik takin an nei niin an sawi a, dan bawhchhiat a awm lo a, ram neih dan tur dik takin sorkarin a pe niin an sawi.
LSC pe kir tawhah pawh hian dan dik taka nei inti, sipai ram chhung ni lo a bula ram nei inti an awm a, dik lo taka an neih vanga an tan ngam loh vang ni lovin mipui hmakhaw ngaiin, mipui tan an LSC hi an pe kir tih an sawi.