Skateboard hmanga America fang chhuak

Skateboard hmanga America fang chhuak
Skateboarding hi zin nana hman ralah chuan chak taka an tleng deuh puat puat a harsa thin ve khawp ang, mahse, Chad Caruso chuan skateboard ringawt hmangin America a tleng chhuak parh a, record a siam. Chad hian ni 57 leh darkar 6 leh minute 56 chhunginVenice Beach, California atanga Virginia Beach, Virginia a thleng hman a, skateboard-a a tawlh thui zawng hi mel 3,162 a ni.
Chad hian a zin kawngah lirthei dang engmah a hmang lo a, skateboard-in a tawlh ngar ngar a, kawng chhuk leh chhoah pawh skateboard vek a hmang a, engmah a inhnuh tawlh tir lova, kawng chhoah a ke pakhat skateboard-ah dahin ke dangin a inrap kal ngat ngat mai a, inrah tawlh nana a hman rim lam pheikhawk chu a hnuai paw a inpan chak hleih thei khawp mai.
Chad, kum 25, hian a thil tih hi ngawlveina leh rilru hriselna lama awareness atana a tih a ni a, amah ngei pawh ruihhlo ngawl lo vei tawh thin a ni a, mahse, kum 9 chhung harhfimin a hun a hmang tawh a, a ruihhlo sim zinkawng leh a America fan zinkawng chu tehkhinin, “A harsa khawp mai, mahse, a inchhirawm loh,” a ti.
Chad chuan, “Ruihhlo ka bansan hian ka nun a thlak danglam hlawk a, ka tihchak zawng leh ka tuina te ka tih leh theih phah a ni. Hei bakah hian mahni inchik peih leh thil tul lo sawi tam loh te hi rilru hrisel nan a pawimawh niin ka hria a, chu chu he thil ka tihna chhan pakhat pawh hi a ni,” a ti bawk.
Skateboard hmanga America tawlh chhuak parh hi skater dang an awm tawh a, mahse, Chad hi midang puihna tel miah lo, tuma tawiawm loha hetiang ti hmasa ber a ni. Chad hian a skateboard bakah a backpack pakhat chiah a kenga, thildang engmah a keng lo a, “Nitin darkar 10 vel bawr, thla hnih vel zet rit taka inah reng chu ka tlin dawn loin ka hria. Ka thleng thui telh telh a, ka mamawh pawh a tlem tawlh tawlh mai a ni,” a ti.
Chad hian chawhrualin nitin darkar 10 vel hun hmangin, nikatah mel 55 vel thleng hman thin ang a ni, a zinkawng tawp lam mel 10 vel chu skater rualin an tawiawm ve a ni.