Smart city mission kan smart phah em?

Kar kalta Inrinnia Smart City Mission kum 8 tlin lawm nana Aizawl Smart City Limited leh Mizoram Cycling Association \angkawp ten an buatsaih cyclothon vai liamtu UD&PA changtu deputy chief minister Pu Tawnluia chuan Aizawl khawpui thuam mawia tih changkan nan project 40 chuang kalpui mek a nih thu te, Smart City hnuaia hmalaknate chu kum nga chhunga zawh fel tur tih a nih laiin Covid avangin kum khat dang pawhsei a nih thu leh nakuma zawh fel hman tum a nih thu te, he project hnuaiah hian \halaite hawiharhna tur leh khawvel zau zawk an thlirna tur project heng —playground, information Kiosk leh intihhlimna hrang hrangte kalpui mek a nih thu a sawi a.
Smart City Mission hnuaia Aizawl khawpui thuam\hatna project 40 chuang kalpui mek hi a chipchiarin sawrkar thuchhuahah tarlan ni lo mah se, Smart City-in a huam tlangpui infrastructure lian zualte hi — water supply, electricity supply, sanitation (solid waste management), urban mobility and public transport, housing (for the poor), IT connectivity, E-governance, health and education bakah, khua leh tui a bikin naupang, hmeichhia leh kum upate himna, tihte a ni a.
Heng a\ang hian zawhna pahnih a lo piang a: ‘Smart City Mission hian engtiang chiahin nge Aizawl khawpui hi a tih ‘smart’ tak?’ tih leh, ‘kum 5 chhung hma lo lak tawhnaah hian ‘khawpui smart sawtna’ langsar taka hmuh tham eng zat nge awm ta? tih hi.
Khawpui a lo smart sawtna eng emaw chu a awm ngei ang tih a rin theih a, chutih rualin, he project hi eng ang chiahin nge khawpui hian a ‘smart pui’ tih hi kan intehna tur ni ta se. Cheng nuai 61 chuang senga Pelican Crossing siam te hi hawn a nihna a rei tawh ngaihtuahin, a nihna tur anga chhawr \angkai a la ni lo te hi engnge a chhan? Khawpui ti smart-tu tura ngaihte hi khawpui tihnawktu mai an ni leh si em? tihte pawh zawhna a awm thei awm e.