Smart City siam tumna
a smart thei rih lo
Khawpui mipuite khawsak phung felfai leh changkang a awm theihna tura Aizawl Smart City Limited hnuaia hmalakna hrang hrang zingah, Aizawl khawpui chhung hmun thenkhata tui thianghlim herh chhuahna leh plastic um her dipna khawl bun chu a nihna tur angin a la smart tak tak thei lo.
The Aizawl Post-in, Aizawl khawpui chhung Local Council thenkhat huam chhung khawlaia tui thianghlim man tlawm zawka herh chhuahna Roadside Drinking Water Kiosk (Tui ATM) leh, plastic um ruak her sawmna khawl Reverse Vending Machine (RVM) a zirchiannaah, hmun thenkhatah mipuiin an chhawr tangkai laiin, hmun thenkhatah erawh mipui hlut a hlawh vak lo va, hmun thenkhatah chuan khawl tha lo a awm nual a, hmun thenkhatah chuan local council lam pawhin an vilzui vak loh a awm bawk.
Aizawl khawpui Local Council 83 zingah hian Veng 24-ah Tui ATM leh, Veng 17-ah RVM bun a ni a. Heng khawl thenkhat hi chu bun a nih hnuah a nihna tur anga khawlin hna a thawh theih loh avanga ngaihsak zui hlawh vak lo a awm nual a. Khawl thenkhat, a bikin tui ATM erawh, khawl a tha tlangpui a, hmun thenkhatah mipuiin an hman tangkai hle laiin, hmun thenkhatah chuan mipuiin an hlut vak lo thung.
Plastic her dipna RVM zingah khawl tha lo a awm nual a, Mission veng ami chu motor-in a sut chhiat avangin tun thlengin siam that a la ni lova. Edenthar veng ami pawh khawl a that loh avangin ngaihsak zui a hlawh vak lo a, tunah hian hma lak thar an tum leh mek. Veng thenkhatah chuan naupang kut hleiin RVM chhungah lungte an vawm lut thin a, khawlin a chhiat phah niin sawi a ni a. Hmun thenkhatah chuan a khawl tha tho mah se, chhawr tangkai a hlawh vak lo bawk.
Tui ATM leh RVM te hian Vaivakawn Vengah hlut a hlawh hle a. Local Council Chairman R. Zothanmawia chuan zirlai leh bazar-a thute bakah kawng kal leh a bul hnaia awm ten an chhawr tangkai a, manhla an ti hle, tiin a sawi a. Tui hi chengkhat thirin litre chanve, cheng hnih thirin litre khat a lak theih a; thla khat chhungin tui man hi Rs 3000/4000 te a tlingkhawm thei, tiin a sawi a. Plastic her dip pawh garbage bag lian ip thum an khawl tawh niin a sawi bawk.
Dinthar Vengah pawh Tui ATM leh RVM hian hlut a hlawh a, thla khat chhungin tui man hi Rs 2000 vel a tlingkhawm hman a, plastic her dip pawh buara ip lian 4 lai an khawl tawh niin a sawi a, plastic dip erawh an la hralh lo.
RVM chhawr tangkai zingah Aizawl Venglai a tel a, plastic her dip bag 5 vel an khawl tawh a, a hralhna lam an la hre rih lo.
Chanmari West Veng chhunga Tui ATM chu hlut hlawh zual zinga chhiar tel theih a ni a. LC Chairman PC Lalawmawia chuan tui man hi thlakhat chhungin Rs 1000 vel a tlingkhawm hman niin a sawi.
Hmun thenkhat chuan Tui ATM a hman theih a, mahse mipuiin an hlut vak lo a, tui bill pawh a tum pha lo niin LC chairman-te chuan an sawi.
-- Advertisement --
ATM leh RVM
4Tui ATM leh Reverse Vending Machine te hi Aug 9, 2023 khan deputy chief minister Tawnluian a hawng
4Local Council 24 huam chhungah Tui ATM pakhat \heuh dah a ni a; LC 17 huam chhungah Reverse Vending Machine dah a ni.
4Tui ATM leh RVM te hi Local Council enkawlna hnuaiah dah a ni.
4Tui ATM-ah hian chengkhat thirin tui litre chanve, cheng hnihin tui litre khat a lei theih. Tui ATM-ah hian \um khatah tui litre 120 a dah theih
4Tui ATM-a tui hi UV filteration hmanga he khawl chhunga awm khawl hrang hrang pathumin a thlitfim hnua lo chhuak a ni.
4Plastic her dip hi \um khatah kg 20 a dahkhawl theih a, Kg 1 cheng 5 zelin bawlhhlawh sawngbawl pawl ‘No Waste’-in an lei \hin ang.
4Plastic her dipnaah hian plastic bur ruak her dip apiangin coupon a lo chhuak a, chumi hlutna chu LC te nena inthlunzawm dawrkai etc hnen a\angin a lak theih \hin dawn a ni.