Smart City thlaktu tur Mizoram Urban Development Agency din

Aizawl Smart City Ltd chu a tawp dawn tawh a, a thlaktu tur leh hmachhawp chhunzawmtu tur Mizoram Urban Development Agency (MUDAL) din a ni tih UD&PA minister K Sapdanga chuan a sawi.
Aizawl Smart City Ltd hnuaia cheng vaibelchhe 14.33 senga sak Chaltlang Multipurpose Sports Complex DIET Aizawl (CMSCDA) chu Zirtawpni khan UD&PA minister hian a hawng a. MUDAL din a nih thu hi sawiin, “Thawktu la turin kan inbuatsaih mek a, September chhunga zawh hman tum a ni. October atang chuan bung nghal thei tura beisei an ni a. MUDAL hian Smart City hmachhawp project pawimawh leh chhuanawm tak tura beisei an thawk chhunzawm dawn,” a ti.
MUDAL hian bawlhhlawh tawih thei lo sawngbawlna hmun tur – Material Recovery Facility leh mi sang chuang eizawnna atana hman tur City Centre chu reiloteah peih hman a tum dawn tih sawiin, heng bakah hian khelhmual pahnih leh motor parking tur an la chhunzawm dawn a; SASCI hnuaia project lian leh pawimawh, Aizawl rotling tur paruk pawh MUDAL-in an enkawl dawn tih a sawi.
Tuna an hawn tak CMSCDA atang hian India ram champion ni thei leh a aia sang pawh an beisei dawn rualin, ruihhlo avanga buaite tana insiamthatna hmun nuam ni tel se an duh tih Home minister ni bawk K Sapdanga hian a sawi.
“A taka hmu lotu tan chuan awihawm loh khawpin Mizo thalai drugs addict an tam. Hengte chhanchhuah leh a la ti loten an tih lohna atana hma lak hi kan ngaipawimawh a, CMSCDA pawh hi drugs addict-ten damna hmun atan hmang se, a sim tawhte tan hmun nuam nise kan duh,” a ti.
Aizawl Smart City Ltd CEO CC Lalchhuangkima chuan CMCSDA hi a neitu tur CMSCDA Management Committee hnenah a hlan nghal a. CMSCDA Management Committee-ah hian Chaltlang khawtlang hruaitute, SCERT leh DIET hotute an tel. Chaltlang, SCERT leh DIET intawm tur niin, a hman dan tur chu CMSCDA Management Committee kutah a awm.