Smart taka classroom kalpui theihnan sawrkarin hma a la – Education minister

Smart taka classroom kalpui
theihnan sawrkarin hma a la
– Education minister
HDFC chuan corporate social responsibility scheme hnuaiah School Education department hnenah smart board 36 a pe a. Hei hi school hrang hrangah sem leh a ni.
Thawhtanni khan School Education minister Dr Vanlalthlana hoin smart class room hi hawn a ni a. HDFC-in smart classroom 36 neih belhna tur an pe chu lawmawm a tih thu a sawi a. Hmalakna dangah smart classroom 220 atan tender chhuah a ni tih sawiin, “Smart taka classroom kalpui a nih theihnan sawrkarin hma a la mek a, khawvel vir ruala kan vir ve theihnan hmanrua hmangin thiamna chi hrang hrang min vur a, chumi uma kan kal ve loh chuan mi hnungah kan kal anga, an neih kan awt mai ang tih a hlauhawm. Chumi atana min puitu tur chu smart classroom hi a ni,” a ti.
Zirna lamah tih dan hlui bakah skill lama kal a ngai tawh a, mahni kutkea din theih dan kawng zawn a ngai tih Dr Vanlalthlana hian a sawi a. Zirna lamah common facility centre ang chi din tam a ngai hle tih a sawi a ni.
HDFC-in CSR scheme hnuaiah hmasawnna programme an kalpui zingah tuna smart classroom hi education lama hmalakna a ni a. Mipui tana an thawh zingah payment gateway hrang hrang – tui bill leh electric bill pekna, zirna in thenkhat fee pekna ang chi an buaipui a ni.
Inkhawm hi smartboard pekna school ten online-in an zawm lo a, heng school-te hian an hman tangkai dan leh hlawkpui dan an sawi a ni.