Zaninah MSL-X khuhhawnna
Mizoram Basketball Associatin (MBA) leh Zonet Cable TV Pvt. Ltd. thawkdunin an buatsaih Mizoram Super League (MSL) season 10-na chu vawiin, 6th March, 2025 zan dar riat hian Dawrpui Multipurpose Hall-ah khuhhawn (tip-off) a ni dawn a, 11th March, 2025 zan atangin R. Dengthuama Hall-ah intihsiak tan a ni ang.
MSL-X main sponsor Sharda University hming chawiin kumin MSL hi Sharda University Mizoram Super League-X tih a ni a, single leg-a khelh tur niin, team pariat an inel dawn a ni.
Tarlan tawh angin, MBA leh Zonet tangdun buatsaih MSL bul tan tur hian kum 2015 khan Zonet office, Zarkawtah inremna ziah a ni a, MSL 1 atangin Pathian hruaina zarah kumtin khaihlak awm miah loa khelh chhoh a nih thu nimina MBA thuchhuah chuan tarlangin, kumin hi tournament kum sawm (10) tlinna chiah a nih avangin MSL – X tia dah a nih thu an tarlang tel.
MSL-X zawh rual hian Mizoram Super League chungchanga Zonet leh MBA inremna ziah pawh a tawp fel ve chiah dawn a, mahse, pawl pahnih hian league kalpui chhunzawm chungchang chu a thuphungin an sawidun tawh a, inremna thar ziah la ni chiah lo mah se Mizoram basketball chanchina tournament pawimawh hi an chhunzawm beiseina a lian.
Zaninah MSL-X khuhhawnna
Get real time updates directly on you device, subscribe now.
Prev Post
Next Post