Mizoram mipui, a bikin political party lama inhmang ve lo leh sawrkar hnathawk ni lo, social activist-ten ZPM sawrkarah beiseina sang tak an neih laiin, thla 5 an sawrkar chhung hian an bei a dawng hle tih Congress MLA C Ngunlianchunga chuan a sawi.
LADC CEM thar C Lalmuanthanga puala Lawngtlai Congress Bhavan-a inkhawmah MPCC vice president ni bawk C Ngunlianchunga chuan, enchhin sawrkarin enchhin an dawl lo hle a, an dawl loh chhan pawh sawi sen a ni lo tih a sawi.
Mizoram politics-a thleng zen zen lo, LADC-a Congress MDC neihchhun chu CEM a ni a, MNF nen thawk duna sawrkarna hi siam an ni a, kawng hrang hrangah thawh ho na tha a awm a ngai a, ram leh hnam tana thawh hona tha neih zel pawh a pawimawh dawn tiin a sawi bawk.
AICC National Executive Committee member Zodintluanga Ralte pawhin India rama sawrkar piang tawh zingah ZPM sawrkar chu thla hnih lek chhunga sawisel kai nasa ber record a tling tih a sawi a. Tunlaiin chief minister Pu Lalduhoma chu hmun thenkhatah a tawng chapo hle tih sawiin, “Congress party chu MLA pakhat lek nei an ni a, an ral tawh dawn, an tho chhuak tawh dawn lo. ti tein min sawi a ni awm a. Amah Pu Lalduhoma hi MLA pakhat pawh nei loin ama party din ngei vawi tam tak inthlan a lo hmachhawn pui tawh thin na result kha ngaihtuah let nachang hria se. Congress sawrkar kha MLA 34 neiin kan tla a, MNF sawrkar pawh MLA 27 neiin an tla a. ZPM pawh hi sawrkar reng tur an ni lo tih inhre ber zawk tur an ni a, term an hmang zo dawn em pawh a la hriat loh,” a ti.
Social activist-te ZPM sawrkarah an beidawng – C Ngunlianchunga
Get real time updates directly on you device, subscribe now.
Next Post