Social media

Information technology thang chho zel hian mihring nunphung a her danglam chak ta hle.
IT hmasawnna avanga lo piang social media hian a tha lam leh a chhe lamah nghawng nasa tak a rawn nei chho mek a, hman thiam chuan hmasawnna chak tak thlentu, hman thiam loh erawh chuan chhiatna nasa tak thlentu a ni thei ta.
Tun hnai maiah I&CT minister chuan ‘social media lamah thudik lo emaw thudik emaw pawh ni se, mi rilru tina thei zawnga thu post leh thehdarh bansan a hun tawh’ tiin a sawi hial a. Hei hian social media hmankhawlohna nasa tak a thleng tawh tih a lantir chiang hle awm e.
Social media hi thuthar inhrilhna hmanrua tha tak a nih rualin, thu thang dik lo vawrh darhna hmanrua tha tak a ni thei nghal a. Thuthang dik lo vawrhdarh hian rilru chiaina a thlen rualin chu rilru chiaina chuan taksa thila chhiatna nasa tak a thlen zui thei bawk a. Hetiang kawngah hian sawrkar thuneitute pawh hian mipui hnenah systematic deuh zawka ‘social media hman dan’ zirtirna lam hawi hi kalpui a pawimawh dawn hle a. Hei mai bakah hian, kan dan siamtute pawh hian, social media chungchangah hian IT Act te pawh ennawnin, dan siam that (amend) ngai te pawh a awm nual tawhin a rinawm.
Mipui zirtirna (awareness campaign) kalpui chungchangah hian, systematic a ngaihna chhan chu, hre tura tinzawn deuh bik (target group) an awm thin a, chung mite chu awareness campaign dawng lo hi an ni duh khawp lehnghal a. Entir nan, cyber crime chungchanga inzirtirna hi kan police lam hian an kalpui tha viau emaw kan tih laiin, ‘ka lo hre lo reng reng a’ tia humsual lo dai thin hi an la tam em em reng mai a ni.
Social media huang chhunga pawimawh em em pakhat chu youtuber-te hi an ni kan ti thei awm e. Hemi chungchangah hian sawrkar hian kaihhruaina mumal tak a siam a pawimawh ta hle niin a lang.
Youtuber tam tak hi chuan Mizo literature hi an pawngsual mek ni ber te hian a ngaih theih tawh a. Hemi chungchangah hian ralkhat atanga sawisel liam mai lova, a taka luhchilh a hun takzet tawh a. “Mizo tawng an lamrik dan a dik lo nasa…” ti liam mai lo va, a dika Mizo tawng an lam rik a, a ngaithlatute pawhin a dik an hriat theihna tura kan in ‘educate’ hi a pawimawh takzet tawh a ni.
Hemi chungchangah pawh hian Mizo Language Board a la function tak tak hma hi chuan, MAL leh MWA lam pawh hian engtin emaw bawhzuiin hma la thei se a duhawm hle a ni.