Social media-a intar lan dan vangin Lalu-a’n a fapa hnawt chhuak

Social media-a intar lan dan vangin Lalu-a’n a fapa hnawt chhuak
Lalu Yadav-a chuan a fapa upa zawk, Tej Pratap Yadav-a chu Rashtriya Janata Dal (RJD) atanga kum ruk chhung atana leh an chhungkua atangin a hnawt chhuak.
Tej Pratap Yadav-a hian a Facebook page-ah hmeichhe pakhat nena a thlalak dah chhuakin hei hi a ‘kawppui’ tia a dah atanga chhungkaw inhnialna chhuakin hetiang hi a thleng zui ta a ni.
RJD chief Lalu Yadav-a hian X-ah chuan ‘fapa upa ber chet dan, vantlang hmaa inlantir dan leh khawsak dan chu kan chhungkaw zahawmna leh kan tih dan thin nen a inpersan hle’ tiin a tar lang.
“Kan mi mal nuna khawsak dan mawi kan palzutna hian khawtlanga kan nunhonaah harsatna a thlen a ni,” a ti bawk.
“Hetiang a nih avang hian kan party leh family chhungkua atangin ka hnawt chhuak a. Tun atang chuan party leh chhungkuaah eng chanvo mah a chelh thei tawh lo vang. Party atangin kum ruk hnawh chhuah a ni a, a nuna tha leh tha lo, mawi leh mawi lo hre rual a ni tawh a ni,” a ti.
Bihar minister lo ni tawh, Tej Pratap Yadav-a erawh insawi thiamin a Facebook account chu khawih (hack)-sak a nih thu leh hmeichhe, Anushka Yadav nen rei tak an lo inkawp tawh thu a sawi.
Social media-a thlalak tar lan hi paih leh tawh a ni a, hetah hian Tej Pratap Yadav hi hmeichhe pakhat nen langin kum 12 lo inkawp tawh angin a intar lang a ni.
He thlalak dah chhuah hi social media-ah sawi zui a hlawh hle a, mi tam tak chuan kum 37 mi, Yadav-a hi kum 2018 khan Bihar chief minister thin, Daroga Rai-a tunu, Aishwarya Rai nen an innei a. A pasal leh a mona chhungkuaten an enkawl dana a lungawi loh avangin Aishwarya-i hi a haw leh thuai nia sawina thlengin a darh zui phah a ni.
Inrinni zan khan Tej Pratap Yadav-a chuan amah leh an chhungkua tihhmingchhiat leh tihmualpho tumna niin X-ah a tar lang a. A social media account-te chu tuten emaw an lo khawihsak niin a tar lang.
“Ka social media platform hi hack-in ka thlalakte pawh an lo siam danglam a ni,” a ti a, amah zuitute chu hetiang thil hi hnawla titi mai mai awih loh turin a ngen bawk.
Tej Pratap Yadav-a hian a account an hak nia a sawiah hian police hnen a thlen em tih erawh hriat a la ni lo.