Social media-a thu lengvakah rilru fim pu turin mipui ngen

Ramhlun South Local Council leh All NGO chuan an veng mi tualthihna chungchangah social media leh thu lengvakah mipuiin rilru fim pu turin an ngen.
Ramhlun South Local Council leh All NGO thuchhuak chuan, 2024 April 19-a an veng mi Freddy Malsawmdawngzela tualthihna chuan an veng mipui a thawng hle a; he thihnaah hian mawhphurtu an awm ngei nia hriat niin, he tualthihna bawhzuia a mawhphurtute mana a tul anga hremna pe turin thuneitute an beisei a, hemi kawngah hian vengchhung mipui pawhin theihtawp chhuahpui an inhuam reng tih a sawi a ni.
Chutih rualin social media leh thu leng vak hrang hrangah mipuiin rilru fim tak pu turin an ngen tih a sawi a. He thihna chhui kawngah hmalakna a chak tawk lo nia a lan chuan Ramhlun South khawtlang chu a tul anga thuneitute pui turin an inpeih reng tih a sawi.
Hetihlai hian he tualthihna nia lang hi police-te chuan uluk takin an chhui zel tih The Aizawl Post chuan thu a dawng a. Finfiahna awm thei ang angte bawhzuiin, he thihnaa inhnamhnawih nei thei awm nia ngaih mipa pakhat leh hmeichhe pahnih chu thu zawhfiah turin an la kawl tih sawi a ni.