Social media lamah mipui tichiai lo tura insiamthat a ngai – Ruatkima

Social media lamah mipui tichiai
lo tura insiamthat a ngai – Ruatkima
Social media hmanga nasa taka mipui ti ralkhel leh ti chiai zawng thehdarha hma la lo tura insiamthat kan ngai tih Information & Public Relations minister Lalruatkima chuan a sawi.
Ningania Kanan Venga hmeitha in sak hlanna inkhawm a hmanpuinaah Aizawl West-II bialtu MLA ni bawk Lalruatkima chuan, chhiat tawh leh chhungkaw harsa leh chhuancham awmte chhawmdawla chhechhuak tur YMA kan nei chu kan vannei hle, tiin, kan khawtlang dinhmun hetiang a nih mek lai hian, a chhelam sawi nasa em em chuan mi nun a ti ralkhel a, mimal nun tamtakin a hruai tha lo thei tih a sawi.
“Tunlaiin thalaite ah aia upa zahna, Zonun zemawi kan neih thin chu a dal lek lek tan emaw kan ram hmasawnna technology-in min delh mek karah kan kohhran hruaitute, khawtlang hruaitute, ram hruaitute kan awmhmun atanga kan dem a, kan sai ta salh salh mai hi a pawi a, mi hmasawnna hlawhtlinnate kan inhmuhpui thiampui a tul,” a ti
YMA Kanan Branch-in an kum 50 tlin, Golden Jubilee lawmna tur puala hmeithai in an saknaah hian bialtu MLA Lalruatkima hian a mimal sum nuai 2 a thawh bakah in bang tur tile leh inchung rangva tur bundle 4 a thawh hmangin YMA leh Kanan Misitir Association ten sak hna an thawk a ni.