Larsap-in Hnahthial tlawh
Larsap Dr Hari Babu Kambhampati leh a nupui Dr Jayashree Kambhampati te chuan Ningani khan Hnahthial district an tlawh.
Hnahthial a luh hmain Tuipui ‘D’ khua a tlawh hmasa a, khawtlang hruaituten an lo hmuak. Tuipui ‘D’ ah hian Project Pushpak-in hun rei vak loa an thawh tan tur, lei dawh turah Project Pushpak BRO Mizoram chief engineer SP Kolipey leh a thawhpuite thil a zawtfiah a. Chief engineer chuan lei dawh tura thil tul hmasate tihfel a ni tawh a, hna thawh tan theih thuai an inbeisei tih a hrilh. Tuipui ‘D’ a Chhimtuipui lui kanna tur hian tunah Bailey bridge a awm mek a; ton 4 aia rit a dawl zawh loh avangin lirthei tenau (LMV chin) chiah kal phal a ni. Lirthei lian – MMV ang chu Marboat-in a phur kai thin a ni. Pushpak hotu chuan Tuipui D Kolodyne Bridge chu Mizoram chhimchhak lam hmasawnna atan a pawimawh em avangin theihtawp chhuahin kum hnih chhunga zawh an tum tih a sawi a ni.
Hnahthial a thlen hnu ah larsap hi district bawrhsap R Lalremsanga hoin sawrkar hotuten an lo dawngsawng a. Hemi hnu hian KVK Lunglei Complex, Hnahthial a pan a. KVK office kawta Horticulture, Agriculture, Sericulture, AH&Vety, KVK leh MzSRLM ten dawrte an hawn chu enpuiin, district office-a hotute, bank hnathawkte, bank-a MUDRA loan latute, kohhran hruaitute, political party hruaitute leh tlawmngai pawl hruaitute a kawm a ni.
Larsap-in Hnahthial tlawh
Get real time updates directly on you device, subscribe now.