Social media sawhkhawk…

Manipur buai avanga Mizoram mi leh sa Manipur-a tangkhangte hruaichhuak tura Mizoram sawrkarin hma a lak dan chungchangah thuthang mak tak tak social media lamah a leng nuaih nuaih a. State dangin Manipura an mi leh sate an hruaichhuah zung zung tawh laiin Mizoram sawrkar chu che muang bik leh tangkhangte ngaihsak tawk lo anga sawi thawm a awm a.
Buaina a chhuah atanga a ni ngana nimin May ni 8 khan Mizoram sawrkar hmalaknain Manipur-a tangkhang mi 52 te chuan Lengpui airport an lo thleng a. Anni bakah hian Guwahati leh Kolkata kaltlanga Mizoram lama lo haw mi za chuangte chu kawngah an la thang mek bawk a. Hriat theih chinah Manipura Mizoram mi leh sa tangkhangte hian him takin Manipur an chhuahsan thei nia hriat a ni a. Hei hi thil lawmawm tak a ni.
Nimina Mizoram lo thlengte puala anmahni lawmna inkhawm Lengpui Airport-a neihah AMSU President, RIMS-a MBBS final year zirlai chuan social media thenkhata Mizoram sawrkar che muang leh hma la tha tawk lo anga demna awm chu a dik lo tih sawiin, RIMS zirlaite zingah phei chuan state dang zirlaite nen an chhuak rual tih a sawi a.
Social media lama Mizoram sawrkar che muang bik leh demna lam rawngkai a darh lai khan, Mizoram sawrkar chuan thil awmzia chiang taka mipui a hrilh lawk loh avangin tangkhangte vua leh vang chi-aina leh rilru hreawmna a thlen phah thei a, social media sawhkhawk tuartute tan chuan rilru hahna a ni a, chu chu a manhla lo hle a ni.
Social media-a thuthang dik lo sawhkhawk hi nasa taka tawrhna thlentu a nih theih avangin mipuiin an tawrh hmaa finfiahna puang zar thuai thei tura thuneituten tan an lak thiam hi a pawimawh dawn hle a ni.