Social security scheme-a inziak lut kan tlem lutuk hi veiawm ka ti – Dr Hari Babu Kambhampati

Social security scheme-a inziak
lut kan tlem lutuk hi veiawm ka ti
– Dr Hari Babu Kambhampati
Mizoram larsap kalchhuak ta Dr Hari Babu Kambhampati chuan Mizorama bank account nei zingah social security scheme-a inziaklut kan tlem lutuk chu veiawm a tih thu a sawi.
Larsap kalchhuak ta hian Mizoram mipui thlahna thuchah a siam a. He dinhmun a chelh ni, 2021 July 19 atanga kum 3 leh thla 5 a liam hnuah Mizoram a chhuahsan a lo tul ta reng a. A awm chhunga politician, sawrkar hnathawk, NGO, kohhran leh mipui thlawpna tha tak a dawn avangin a lawm hle tih a sawi.
Mizorama a awm chhungin 2023 MLA inthlanpui, 2023 Lok Sabha inthlanpui bakah tualchhung inthlan tam tak kalpui dan a hriatpui a. Inthlanna muanawm, felfai leh langtlang neih a ni thin leh Assembly House chhungah boruak muanawm leh entawntlak tak lantir a ni thin chu fakawm a tih thu sawiin, “India ram hmun dang pawhin entawn se ka duh khawp mai. Mizoram pawn atanga election cover tura lokal media-te pawh Mizorama inthlanna kalpui dan hi democracy laimu dik tak lantirna a nih thu ka hrilh bakah midangte entawn atan puangzar turin ka chah hial a ni,” a ti.
Mizo thalai zingah thiamna leh theihna nei tha tak tak an awm tih Dr Hari Babu Kambhampati hian a sawi a. Mahni awmna hmun leh nuam tihnaah awm mai loin, Mizoram pawna hna thawh tum turin a chah tih a sawi. Kan hnam ziarang midang zirtir bakah hnamdang tihdan phung leh hnam ziarang hriat tum turin a chah bawk.
Sawrkar laipui scheme pawimawh tak tak Mizoramin a tangkaipui theih turte tha taka kalpui zel a tul tih a sawi a. Mipuiin social security scheme hnuaia hamthatna awmte an hman tangkai theihnan tan lak zel a tul, tiin, “Mizoram mipui bank account nei zingah social security scheme-a inziaklut an tlem lutuk hi veiawm ka ti a; hemi kawngah hian theihtawp chhuah chhunzawm zel a tul,” a ti.
Kum 10 kal ta chhungin Mizoramin kawngpui leh inkalpawhna lamah hmasawnna hrang hrang chhinchhiah tlak tak tak a nei tih a sawi a. Nakum maiah Sairang thlenga rel lut thei tura beisei mek a ni bawk tih sawiin, “Heng hmalakna pawimawh tak tak hian Mizoramah hmasawnna lian zawk a thlen ngei dawn a. Hmasawnna ruhrel pawimawh hi tangkai thei ang bera hmanga hma sawnpui tum theuh turin Mizoram mipui ka chah a ni,” a ti.
Mizoram chu ram mawi, boruak thianghlim, sik leh sa nuam leh tourism sector-a theihna nasa tak nei a ni tih a sawi a. A mi chengte pawh hawihhawm leh inthununna tha tak nei leh dan zawm thami an ni, tiin larsap kalchhuak ta hian a sawi. Mizoram khawpui ber Aizawl chu khawpui fai leh ri bengchheng tlem, a bikin traffic dan zawm tha leh lirthei horn hmeh rik ngai lohna khawpui tia hriat lar a ni chu India ram hmun dangte tan entawntlak tak a ni tih a sawi.
India ramin PM kaihhruaiin kum 2047-ah Vikshit Bharat nih a tumna tihlawhtling turin Mizoram pawhin India ram hmun dang ruala hma a sawn a ve zel a ngai Dr Hari Babu Kambhampati hian sawiin, he dinhmun thleng tur hian sawrkar laipui scheme leh policy pawimawh tak takttheihtawp chhuaha ngaihvena tawiawm theuh turin a chah tih a sawi a ni.
“Mizorama ka chen chhunga ka hun hman dan kha ka hrereng tawh dawn a. Ka ngaihluin ka vawng reng ang. Mizoramin malsawmna dawng chhunzawm zel se, kan inhmuh leh hma zawng dam takin mangtha vek u le,” a ti.
Mizoram larsap kal chhuak Dr Hari Babu Kambhampati hian January zing dar 8.00 khan Aizawla Raj Bhavan a chhuahsan a, Lengpui Airport-ah chief minister Lalduhoma chuan amah thlahna a lo buatsaih a. Mizoram tana tha leh tui a lo sen tawhna avangin lawmthu a hrilh. A hna thar atan duhsakna a hlan bakah remchang hmasa bera Mizoram tlawh leh turin a sawm a ni.
Larsap thlahnaah hian Assembly speaker Lalbiakzama, Home minister K Sapdanga, PWD minister Vanlalhlana, chief secretary Khilli Ram Meena, DGP Anil Shukla leh official dangte an tel a ni.
January 3 khan Odisha larsap ni turin rinawmna thu tiamtira lakluh a ni a. Mizoram larsap thar tur Gen. Vijay Kumar Singh chuan January 8 hian Mizoram lo thlengion, ruahman dan chuan January 9-ah Raj Bhavan-ah Mizoram larsap 23-na atan lakluh a ni ang.