CS-in kawngpui ngaipawimawh

CS-in kawngpui ngaipawimawh
Chief secretary Khilli Ram Meena chuan Inrinni khan Kolasib district a tlawh a. Bawrhsap Robert C Lalhmangaiha’n lo dawngsawngin an district-a head of office-te nen an thukhawm.
Chief secretary hian Kolasib district-a sawrkar hmalakna hrang hrang a thlirpui a. Sub deputy commissioner Zorinsangi chuan an district chhunga sawrkar department thlan bik hmalakna sawizauin, district adminstration indin chhoh dan powerpoint hmangin a sawifiah bawk. District superintendent of police David Lalthangliana’n sawrkar dan leh inrelbawlna kenkawh dan a report a ni.
Kolasib district chu Mizoram state luhkha pawimawh a nih avangin sawrkar hmun pawimawh tak a ni tih chief secretary hian a sawi a. Sawrkar anga hmalakna tur awm pawh chak taka kalpui a tul, tiin, inkalpawhna kawng tha neih chu hna hmasa a ni tih a sawi. Loneitute chu mipui nunna hnar an nih angin loneitute mamawh ngaihtuaha an hnena thlen chu sawrkar ngaihpawimawh a ni tih a sawi bawk.
Kolasib chu Assam state nen inthenawm a nih avangin sawrkar dan kalha state pawn atanga thil chawkluhna kawng a ni tih hrereng turin sawrkar hotute hi a chah a. Hemi kawnga chak zawka hma lak a nih theihnan, state thenawm nen inlaichinna tha siam a pawimawh a, state sawrkar thuneitute nen pawh inbiakpawh that a tul tih a sawi a ni.
He hunah vek hian NHIDCL-in national highway an siam mek leh kawngpui dang an khawih chungchanga hmalakna chief secretary ho hian thlir a ni a. Kolasib chu Mizoram mipui mamawh chawkluhna kawng a nih angin, kawngpui tha neih theihnan chak tak leh tha taka hna thawh a tul, tiin, NHIDCL chu an theihtawp chhuah turin a chah.
Chief secretary hian Bukvanneia Godrej Palm Oil Mill a tlawh a. Oil palm hmanga hmalakna chu India sawrkar ngaihpawimawh a ni tih sawiin, oil palm hmanga eizawnna leh intodelhna kawng zawh a nih theihnan theihtawp chhuah a tul tih a sawi a ni.