Solar power kan uar dawn – Power minister

Solar power kan uar dawn
– Power minister
Sawrkarin ni zung chakna hmanga kawlphetha siam turin hma an la nasa dawn a; Mizoram chhim leh hmar, chhak leh thlangah solar power plant an bun dawn tih Power minister F Rodingliana chuan a sawi.
Thawhtannia Tuirini Small Hydro Electricity Power Plant dinna tur lungphum phumnaah Power & Electricity minister hian, megawatt 15-20 inkar theuh chhim leh hmar, chhak leh thlangah solar power plant din an tum tih a sawi a. Khaw chhiat lai leh thildang vanga siam mai harsa khawpa power line chat leh power supply tibuai thei thil dang a awm palh pawha Mizoram khawi hmunah mah harssatna nasa tak kan tawh tawh lohnan hei hi ruahman a ni tih a sawi.
“Solar power kan uar dawn a, chhunlamah solar power a tam thei ang hman a, zan lamah hydro power hman turin kan inruahman,” a ti.
P&E department-ah thawktute an thawhhona a tha em em a, hna pawh an thawk nasa a, an engineer-te pawh ‘table engineer ni mai loin, ‘site engineer’ an ni tawh zawk tih minister hian a sawi bawk.
Hetihlai hian chief minister Lalduhoma chuan, Vankal Solar Power Plant chu a transformer a chhiat avangin hun engemawchen hman theih lohin a lo awm tawh a, Mizoram sawrkar ta a nih loh avangin an hman theih loh pawh hian ‘hman theih loh man’ cho tho a lo ngai si a, thla khatah cheng nuai 10 vel chawiin, nuai 387 vel department-in a lo chawi tawh a; hei hi tunhnaiah a hre ve chauh a, P&E engineer in chief hnenah a rang thei anga transformer thlakna tur ngaihtuah turin a hrilh a, an hmuh ve leh Finance-in a leina tur an pe anga, bun nghal a ni dawn tih a sawi a ni.
Nikum December khan megawatt 10 pe chhuak Thenzawl Solar Power Plant an hawng a. Sumsuihah Mw 5 pe chhuak thei tur Solar Plant an thawk mek a, hna zaa 20 an zo tawh tih sawiin, hei hi Mizoram sawrkar ta liau liau a ni tih a sawi bawk.