Sonia-te nufa leh Hawla’n Manipur buaina sawikhawm

All India Congress Committee (AICC) hruaitu Sonia Gandhi leh Rahul Gandhi te chuan an chenna, 10 Janpath New Delhi-ah India ram Congress party rorelna sang Congress Steering Committee member Lal Thanhawla chu Inrinni tlai khan lengah sawmin Manipura Zofate tawrhna titawp tura chak zawka hmalak theih dan an sawipui.
Congress hruaitu Lal Thanhawla chuan Manipur-ah BJP sawrkar leh central-a Modi kaihhruai BJP avanga Zofate tawrhna rei lutuk titawp tura a ranglama hma lak thuai a tul tih sawiin, an nunphung pangngaia awm leh tur pawha hun a duh rei tawh tur zia leh chutiang nunphung pangngaia nun an la hlat zia a sawi a. Zofate chunga rawva taka BJP sawrkar chet dan chu tih tawp thuai a nih dan tur an sawi a ni.
Kumin MLA inthlanah Congress party-in Mizoramah sawrkarna a chan ngei a ring tih Lal Thanhawla hian sawiin, chumi tur chuan Mizorama mi rinhlawh, mi tha tak tak, an beisei phak loh ten Congress an zawm a, tunah pawh mi tha, ram hruai tura mipuiin an duhten an zawm leh thuai dawn tih a sawi a. Heng mite hian Pu Lalsawta hoin Mizoram mipui beisei leh an tuihalna sawrkar tha an pe dawn, tiin, chu’ng atan chuan Rahul Gandhi chu a tul anga an chhungkua pawha che chhuak turin a ngen.
AICC hruaitu Rahul Gandhi hian Mizoram mipui chu a pa atang tawhin an chhungkaw ngainat an ni a. Mizoram mipui mamawhna anga chet chu an tan thil tih chakawm tak a ni reng tih a sawi a. A tul anga Mizoram tana chet zel an tum tih a lo hrilh a ni.
MPCC president Pu Lalsawta hoin kumin July 4 khan AICC president Mallikargun Kharge leh Rahul Gandhi te hian Manipura Zofate tawrhna chungchang leh India rama Kristian-te chunga hleilenna chungchanga hmalak dan tur hi AICC office New Delhi-ah an lo sawi ho tawh a ni.