Sorkar lakluh kelin hri vei

Tunlaiin khaw pahnihah kel natna hri
a leng a, sorkarin hmun dang atanga kel a lakluhte hriin a tibuai mek. Hrileng hi a vanglai a ni tawh lo a, a zia tan tih thu dawn a ni.
Serchhip district-a khaw pahnih, Thinglian leh Lungpho-ahte hriin kel a tibuai a, July ni 7 thleng khan Thinglianah kel 85, Lungpho-ah 43 a thi tawh.
Thu dawn danin, kel hian Peste des petits ruminants (PPR) hrileng an vei a, June kha a nasat lai niin, thla tawp lam atang kha chuan a zia tawh.
Thinglianah hian sorkarin kel 92 a sem a, chung zinga 85 chu a thi a, Lungpho-ah kel 56 sem a ni a, chung zinga 43 chu a thi. Thinglianah hian kel sem ni lo, a awm sa pariat a thi tel. Lungpho-a hian chungkaw 50-in kel hi an dawng a, Thinglianah chhungkaw 82-in an dawng.
Kel hi state pawn atanga lakluh a ni a, May ni 28 khan Thinglian leh Lungpho hi phurh thlen niin, an thlen hnu lawkah hri hian a tibuai ta a ni tih thu dawn a ni.
A tirah dah hran niin, uluk taka enkawl an ni chungin kel zingah dam lo a awm a, a pung ta zel a, theihtawpa enkawl an ni chungin a tam zawk chu a thi ta a ni. Lungpho-ah enkawl dam 13 vel, Thinglianah pasarih vel a awm nia hriat a ni.
Veterinary science lam thiamte sawi danin, he hri PPR an tih hi a hrana enkawl dan bik awm lo natna a ni a, antibiotic hmanga enkawl bak chu tih vak ngaihna a awm lo.