Sorkar sikul 8%-in tlem, mi mal ta 14.9%-in pung thung

Sorkar sikul 8%-in tlem, mi mal ta 14.9%-in pung thung
Kum 10 liam ta, 2014-15 leh 2023-24 inkar chhungin India-ah sorkar sikul zat chu 8%-a a tlakhniam laiin mi mal enkawl sikul chu 14.9%-in a pung thung.
Thawhtannia Lok Sabha rorel inkhawmah hei hi sawi chhuah niin 2014-15-a sorkar sikul 11,07,101 awm chu 2023-24-ah chuan 11,07,101 chauh a awm tawh a, 89,441 zetin a tlem a. Mi mal sikul erawh hetih chhung hian 42,944-a pungin 2,88,164 atangin 3,31,108-ah a kai thung.
Madhya Pradesh-ah sorkar sikul awm zat tlahniam berin 29,410 leh Uttar Pradesh-ah 25,126-in a tlahniam a, sikul awm zat tlakhniamnaah 60.9% zet thawhtu an ni a. Uttar Pradesh vekah hian mi mal sikul 19,305 zeta pungin ram puma a punna 44.9% thawhtu a ni bawk.
Madhya Pradesh-ah hian 24.1% zetin sorkar sikul hi kum 10 chhungin a tlem hman a, 1,21,849 awm thin chu 92,439 chauh a awm tawh tih Minister of State (MoS) for Education Jayant Chaudhary chuan West Bengal-a Hooghly Lok Sabha bialtu Rachna Banerjee zawhna a chhannaah a sawi.
Madhya Pradesh hi Jammu & Kashmir chuan dawtin 21.4%-in sorkar sikul a tlem a, 23,874 awm thin chu 18,758-ah a tlahniam a. Odisha-ah 17.1%-a tlahniamin 58,697 atangin 48,671 chauh a ni tawh bawk.
Hetih laihian sorkar sikul punna state pawh a awm ve tho va, Bihar-ah chuan 5%-a pungin 2014-15-a sikul 74,291 awm thin chu 2023-24-ah chuan 78,120 a awm tawh.
Minister hian sorkar sikul zat a tlakhniam chhan hi chiang takin a sawi thei lo va, education hi danpuiah concurrent list-ah a awm a, ‘hawn, khar leh thawktu sem zai ngai zawng zawng chu state/UT sorkar thu’ a nih thu a sawi.
Mi mal sikul punna lamah Bihar chu a pung nasa ber niin 179.14% zetin kum 10 chhungin a pung hman a, 2014-15-a 3,284 chauh awm thin chu 2023-24-ah chuan 9,167 zet an nei tawh a. Odisha chuan mi mal sikul punnaah dawtin 80.36%-a pungin 3,350 awm thin chu 6,042 an nei tawh.
Hetih lai hian mi mal sikul tlem sawtna pawh a awm a, state/UT pathum niin Meghalaya-ah 5.36%-a tlahniamin 2,274 nei thin chu 2,152 chauh an nei tawh a. Delhi-ah pawh 2,641 awm thin chu 2,565-ah tlahniamin Himachal Pradesh-ah 2,614 atangin 2,607-ah an tlahniam bawk.