Delhi Inthlan: Kejriwal-a’n bial 55 lak a inring

Delhi Inthlan: Kejriwal-a’n bial 55 lak a inring
Aam Aadmi Party (AAP) hruaitu, Arvind Kejriwal-a chuan Delhi assembly inthlan mai tawh turah an party chuan bial 70-ah bial 55 an lak a beisei thu a sawi.
Kejriwal-a hian hmeichhiaten vote an thlak tam phei chuan bial zawng zawng deuhthawhah an chak vek theih hial a rin thu a sawi bawk a. “Tun inthlan hi hmeichhiate tan a ni a. An lo thawh chhuah that chuan bial 60 chuang kan la ang. AAP hi New Delhi, Jangpura leh Kalkaji bialah phei chuan chanchin danglam siam khawpin kan chang chiang ang,” tiin a sawi tih news agency ANI-in a tar lang.
Delhi assembly inthlanah hian Nilainiah vote thlak tawh tur a ni a, Inrinniah vote tlate chhiar a ni ang.
Kum 2020 inthlanah khan AAP hian chiang taka sorkarna siamin bial 62 lain BJP-in a dang pariat an chang ve a, Congress phei chuan MLA an nei pha lo.
Kum 2015 khan AAP hi che tha lehzualin bial 67 an la a, BJP-in bial thum changin Congress an artelukawn tawh bawk.
Inthlan atana campaign hi Thawhtanni tlai dar 5:00 khan a tawp ta bawk a. Election Commission chuan Model Code of Conduct (MCC)-in a tih angin vantlang inkhawm, inthlan kaihhnawih thiltih leh campaign dan dang hrim hrim a khap tawh.
Tun tumah hian AAP, BJP leh Congress an inbei nasain video hmang te, politics tawngkam na tak tak leh vantlang inkhawm lian tak tak huaihawiin mipui thinlung hmin an tum.
AAP hian BJP chu ‘Bharatiya Jhootha Party’ leh ‘Gali Galouch Party’ tiin an sawi a, Prime Minister Narendra Modi-a chuan chhangin AAP chu ‘AAP-Daa’ (chhiatna) tiin a sawi let a, an chief Kejriwal pawh ‘Ghoshna Mantri’ tiin a ko bawk.