SORKAR THAR SIAM TURIN MIZORAM MIPUI AN INPEIH TAWH

By MC. Lalthianghlima
Kum 2023 MLA inthlanpui chu thla tamin min dâl tawh lova, political party hrang hrangte pawh khawdang an hawi thei meuh tawh lova 2023 MLA inthlanpui kan neih turah hian, sorkarna siam ngei tumin an inpuahchah mêk a. Hetih rual hian ram mipuite pawh an thinlung a inbuatsaih mêk a, kan ram kalphung hi ngun takin an chîka tunhmaa sorkarna lo chelh tawhte leh vawiina sorkarna fawng chelh mêktute hi an han thlîra kan ram tân hmasawnna kawng hrang hrang thawh leh tih neilo chu an niin an hre lova, nimahsela sorkar kal tawh leh sorkarna chelh mêktute hian ram mipui hmasawnna tur thil tak tak hi ngaihtuahlo leh kan nih tur anga thawk tâwklo niin an hria ni ngei tur a ni, sorkar thar sorkarna vawikhat pawh la chelh ngailo party hi sorkarna pêk tumin an rilru siam fel tawhin, sorkar thar siam turin ram mipuite chu an inpeih at tawh niin a lang.
Thangkhat lian âia rei mah chu, he kan ram politics hi sem leh dawn policy-a neihtute’n min kaihruai tawh a. Chu sem leh dawn policy chu ram mipuite chuan an han zir chiang a, he thil hian mipui min âwk-âi rei ta a, hmasawnna tak tak leh dinchhuahna min thlen lohzia leh an insawi anga an sem tak tak loh ziate an hre fiah tial tial a, mipui an harh chhuak a, an ning tawh a, an ning mai ni lovin, kan moral (rilru put hmang) leh kan value system (kan thil ngaih hlut zawng) thlenga min ei chhiat nasatzia an hrechhuak tawh a, an duh tawh lo takzat niin a lang.
Cheng nuaih khat (NLUP) leh cheng nuaih thum (SEDP) tawktarha hmangtute’n sorkarna an han chelh meuh chuan, an inzawrh ang a puitlin theih tak tak lohzia leh inbumna ni hialin an hria nge ni, khurpuia khawh lût zur zur kha, herh haw an tum meuh chuan chhawl hal pawh hnem zo lo a nihzia hriain hetiang kalphung hi an duh hauh tawh lo a ni. Hetiang system chhe lutuk hmanga inhnuh kawi inhnuh kawi âi chuan, mahni kut kawih ngei a dik tak leh rinawm tak a sorkar nên thawh dun a, dinchhuah (Kalphung thar, mipui sorkar) hi ram mipuite hian an duh tawh a, chu ngei chu an thinlungin a thlang fel diam tawh a, chu an duhthlanna chu 2023 MLA inthlanpui kan neih turah hian vote hmanga lan chhuahtir an tum ta a nih hi.
MLA inthlanpui kan hmachhawn turah hian SASCI pawisa leh khawi pawisa emaw pawh khâwm a, vaibêkchhe têl leh SEDP (Pawisa sem) hmachhuana MLA tlin tumte party âi chuan, vawiina an MLA candidate-te ti hautak lo tura mi huan sama inhlawh leh mi loa hlo thlova, bazara sum tuak tlauh tlauhte leh a remna apianga inhlawhfa, candidate-te puih lêt tum tlat party hi mipuiin an support ta a nih hmel.
Party pakhat hotupa ber chuan, party pakhat chungchang sawiin, an candidate-te chu an headquarters-in cheng nuaih 4/5 pêk tur an neih a rin loh thu leh, pawisa pûk chhawpa an campaign tur thu a sawi a. Anni chuan pawisa hmachhuanin he ram mipuite hi an party-in sorkarna siam leh tura lei theihah a ngai ni berin a lang. Mipui thinlung erawh a hmu hauh si lo, party pakhat hotupa berin pûk chawpa MLA inthlanpui campaign tura a sawi party ngei chu, he ram mipuite hian an lainatin puih an tum a, an pui mêk bawk niin a lang.
Tlangvâl pathumin khawkhat nula hmeltha leh fel an chhai-a, chu nula chuan tlangval pathumte chu a-tua mah be chhe chuang si lovin, chhungkua an din huna innghahna tlâk leh amah hmangaihtu tak tak chu a hmuh kân hauh lova, ngawi rengin a pasal atâna duh a thlang fel ang mai hian, he ram mipuite hian kan tlangvâl pathumteah hian duh an thlang fel tawh a, chu an duh thlan fel tawh sa chu pawisa tam tak hmanga lei emaw tih danglam theih a ni tawh lo va, kan zoram chhe mêk tungding a, siam tha thei ngei tur sorkar thar piantir hi an tum a, sorkar thar siam turin ram mipuite an inpeih fel tawh a, man an inhlan fel tawh a, inkutsuih chiah an hmabâk tawh a ni.