South Africa-ah ANC dinhmun tha vak lo

South Africa chuan May thlaah inthlanpui a hmachhawn dawn a, poll lak thenkhatah rorel lai mek African National Congress (ANC) chuan kum 30 hnuah a tum khat nan vote 50% aia tlem a hmu thei an ti.
Nelson Mandela kaihhruaia apartheid dodaltu party chuan thlawptu a nei tlem tial tial tia sawi niin chuvang chuan coalition sorkar a pian theihna a sang hle a ngaih a ni.

South Africa inthlan?
May 29 ah South African maktaduai 28 dawn chuan national leh provincial parliament a an aiawh tur an thlang dawn a. Democratic election tum sarih an neihna tur a ni bawk.
Kum 1994 a white-minority te rorelna tihtawpa ANC tena thuneihna an chan atang khan kum nga danah inthlanna la neih zel a ni.

ANC dinhmun leh an policy te?
ANC te chu President Cyril Ramaphosa kaihhruai mek an ni a, sawiselna an tawk nasa hle thung.
Unemployment a sang em em a, nikum khan 32% lawih niin intluktlan lohna te, eiruka inpuhnate leh electricity mumal lo lutukte chuan sorkar lai laka rinna a titlahniam hle.
Tharumthawha sualna lam a nasa bawk a, kum 2023 kum tawp thla thum chhung khan nitin inpawngsual tum 130 leh tualthahna 80 thleng reng anga chhut a ni a, chu chuan mipui nawlpuiah ANC rinzawh lohna a siam nasa bawk.
ANC te chuan theihtawp chhuaha harsatna sukiang tura an thawh thu an sawi thung a. Retheihna nasa taka tlahniamin South African tam ber ten chenna In tha leh healthcare tha an nei tawh tiin an insawi ve thung.
ANC te chuan kum nga lo kal tur chhungin hna maktaduai khat chuang siam intiamin chumai bakah investment nasa takin private sector a kalpuiin eirukna tihtawp an intiam bawk.

Tu te nge DA leh EDD opposition te?
Opposition party lian ber Democratic Alliance (DA) te chuan an ram chuan buaina nasa tak a tawk mek an ti thung a. Economy liberalise duhin nasa zawka privatisation kalpui an zuar thung.
Sorkarna an chang a nih chuan hna maktaduai hnih siam intiamin, electricty mumal lo lutuk chu chinfel mai bakah violent crime a zah ve a tihtlem an intiam bawk.
Unemployment leh inequality nasa lutuk chinfel nan party len lama pathumna Economic Freedom Fighters (EFF) te chuan economic solution neiah an inchhal ve thung a.
ANC te chuan apartheid hnua racial economic inbuk tawk lo chu an la chingfel lo tia sawiin ram ruakte pawh mirethei zawk te hnenah an sem tur thu an tlangaupui thung a.
EFF te chuan mines, banks leh economy a pawimawh thil dangte chu nationalise intiam bawkin South Africa hausakna chu mipui nawlpuiin an chan ve theih nana ruahmanna siam an intiam bawk.

Jacob Zuma leh MK party?
South Africa president hlui Jacob Zuma, eirua puh avanga Ramaphosa leh a hotena an nawr thlak tak leh lung in tang tawh hial chuan ANC te chu a cho ngang ngang hle thung.
ANC armed wing hlui hming chawia sak uMkhonto we Sizwe (MK) party te chuan nasa taka hma lain a bik takin Zuma home province KwaZulu-Natal ah chuan danglamna siam nasa thei an ni. Inthlan atana an iznawrhnaah hna maktaduai nga siam an intiam bawk.

Tu nge South Africa president ni thei ang?
South Africa mipui ten president an thlang ngai lo va, National Assembly member 400 an thlang chhuak a, chung mite chuan thlan chhuah an nih atanga ni 30 chhungin president tur an thlang leh thung.
Chuvang chuan presidential candidate siam a ni ve ngai lo va, mahse, party leader tin te chu president ni tura chhawpchhuaha ngaih niin hmatheh an ni thung.
ANC chuan President ni mek Ramaphosa an zuar a, DA ten John Steenhuisen leh EFF ten Julius Malema te chu an hmatheh a ni.
Heng leader tinte hian President an nih theih nan chuan National Assembly-ah majority an neih hmasak phawt a ngai a ni.

Inthlan kalphung?
National Assembly member 400 awmnaa party tin tena seat an neih zat tur chu an vote share-in a hrin tur a ni. Kum 2024 inthlanah a tum khat nan independent candidate te an awm dawn bawk a. South African te chuan vote pathum an thlak a ngai dawn a ni.
1. National parliament : Seat 200 awmna political party te hming chauh ballot a chuannaah vote thlak a ni dawn a.
2. National parliament: Seat 200 la bang te mahse ballot paper hran province pakua-a an province a zir zela party-te hming chuanna leh independent te pawh tarlanna.
3. Provincial assembly : Regional legislature a independent candidate leh party te hming chuanna.

South Africa a coalition sorkar siam theihna?
Constitution in coalition sorkar siam dan tur a sawi lang lo. Mahse, ANC te chu party lian ber tura ngaih ni se, party tenau zawk tena an thlawp chuan sorkar siam theih a ni.
Lehlamah chuan ANC te chuan party dang te nen formal coalition ziaka dahin an siam thei bawk ang a. Chutiang bawk chuan party dangte pawhin an siam thei tho bawk ang.
Chutihrual chuan opposition coalition pawh piang thei a nia. DA hmalakna in Multi-Party Charter for South Africa tih chu kalpui mek a ni a. Inthuruala seat 50% aia tam an la a nih chuan coalition sorkar siam turin inremna an siam tawh a, mahse, inremna siamah EFF te an tel ve lo.