South Florida-a thlawhna tlaah a chuang pakua thi vek

US-ah South Florida-ah, mihring chenna bul hnai lawka sumdawng lianten veivah nana an hman thin thlawhna lian vak lo tlaah mi pakua an thi.
US Transportation Secretary Sean Duffy-a chuan Pathianni (India-a Thawhtanni zing khaw var hma)-a ‘chetsualna lungchhiatthlak tak’ thlengah hian a chuang zawng zawng an thi vek tih X-ah a tar lang.
Federal Aviation Administration staff-te chu a tlak chhan chhuinaa National Transportation Safety Board pui turin a hmun an thleng tawh tih Duffy-a chuan a sawi bawk.
LiveATC.net atanga an tlak hma lawka thlawhna khalhtute pindan atanga inbiakna record tihdarhah chuan a khalhtu hian harsatna an tawh thu leh chak taka an thlawh san zawng a hniam thu a sawi lai a hriat theih a. “Hun kan nei tawh lo,” tih a sawi lai a hriat theih bawk.
A hnu lawkah thawktu pakhatin, “Leiah kan tla dawn mek,” tih a sawi lai a lang leh bawk.
Thlawhna hi sumdawngten veivahna atana an hman lar tak, Learjet 60 a ni a, Austin, Texas atanga Bahamas pan a ni a. Austin-Bergstrom International Airport chuan mi mal ta a nih thu an sawi tawh a, tute nge chuang tih erawh an sawi lo thung.
Video darhah chuan thlawhna hi van sang atangin chak takin leiah a bir thla a, lei a na taka a insawh hnuah nasa takin a puak zui a, a kang zui nasa hle bawk tih a lang.
Video dangah pawh a keh them darh nuaih leh kang nasa tak hmuh theih a ni a, a bula kalna kawng awm pawh a tichhia a, mi tlanchhia leh en hnaih tuma kal hnaite pawh hmuh theih a ni bawk.
Thlawhna hi chenna in leh lirthei kal vel awmna hnaih taka tla a ni a; mahse, Florida Governor Ron DeSantis-a chuan vanneihthlak takin lei lamah thi leh hliam an awm lo niin thuthar lakhawmtute hnenah a sawi.
Chhiatna thlenna hmun hi a tlawh nghal a, a hmun atang hian DeSantis-a chuan thlawhna tla chu ‘rapthlak tak’ a nih thu leh ‘missile rawn thlawk ang maiin a lo tla a, a tlakna sir kawngpuiah pawh khuar lian tak a awm phah a ni,” a ti.