South Korea ram kang tichhuak palhtu chhui mek

South Korea ram kang tichhuak palhtu chhui mek
South Korean police chuan an ram chanchina ram kang nasa ber thleng an chhui meknaah mi pakhat, a chhungte thlan tifaiin tihpalh thila a tihkan ni theia hriain an umzui mek tih Pathianni khan an puang.
Interior ministry chuan hmun 12 chuangah ram kang hi awmin thli na tak leh ro takin a pui tha bawk si a, mi 30 chuang thiin ram hectare 48,000 chuang a kang chhia tih a sawi.
North Gyeongsang province-a Uiseong chu a tuar na ber lai niin ramngaw tha hectare 12,800 a kang chhia a. Mi pakhat kum 56 mi, March 22-a a pi leh pute thlan tifaiin tihpalh thilin a tikang palh nia an hriat thu province police chuan an sawi.
“Kang mei tichhuaktu nia rinhlelh a nih avangin Inrinni khan thubuai kan siamsak a, hren erawh a ni lo,” tiin thuneitu pakhat chuan AFP hnenah a sawi.
Chhuitute chuan a hmunhmate an endik zawhah thu zawh fiah turin an la ko chauh dawn a, thla khat chuang mah endik hian hun a duh dawn niin a sawi bawk.
An mi rinhlelh fanu chuan chhuitute hnenah hian a pa hian thlan lo zar hliahtu thing tang leh zarte chu a mei tanna lighter hmanga a hal thu a sawi a. “Mei hi thli na takin chhem alh zualin ram kang nasa tak a siam palh ta a ni,” tiin thuneitute hnenah a sawi niin Yonhap news agency chuan a sawi.
Police hian he mite pafa hi an nihna kimchang an la puang zar duh rih niin AFP chuan a tar lang.
Ram a kanna hmunah hian tun hnai thla eng emaw zat chu ruahtui an dawn ang thin pangngai an dawng pha lo va, hei vang hian khua a ro em em a, thli a thawt nasat bawk si avangin a inman kai chak ta hle a. South Korea hian nikum khan a lum ber kum a tawng hial a ni.
Thi 30 awm tawh zinga pakhat chu helicopter khalhtu niin tlangrama kangmei thelha a beihnaah a tla a ni.
Ram kang hian Uiseong-a kum zabi 7-na lai vela din, Gounsa temple complex telin hman lai hmun hlui hlu tak tak a kang chhe bawk.