Spain leh Barcelona great Iniesta chawl ve ta…

Spain leh Barcelona great
Iniesta chawl ve ta…
Kum 40 mi lai a lo ni ve ta bawk a, Thawhtanni khan a vanglaia midfielder hmuhnawmberte zinga pakhat Andres Iniesta chuan eizawnna’na football khelh a bansan thu a puang ve ta.
Spain tana World Cup trophy hawn tawh Iniesta hi football history-a player ropuiberte zinga pakhatah ngaih ngheh hmiah a ni a, Spain leh Barcelona midfield-a Xavi Hernandez leh Sergio Busquets-te nena vanglai an hmangho tluka hmuhnawm kha football team dangah hian hmuh tur a awm bik lo ang tih thin a ni!
Ram tan game 131 khel tlingin, chu’ng zinga pakhat chu 2010 Fifa World Cup final-a chakna goal a thun kha a tel a; kum 2008 leh 2012 European Championship-ah Spain a champion-pui bawk.
Chawlh thu a puan rualin Iniesta chuan, “He ni hi a herchhuak ang tih ka ngaihtuah ngai lo. Ka suangtuah chhin duh lo.
“Ni e, he mittui tla zozai hi phurna sosang leh inchhuan larhnain a kohchhuah mittui a ni.
“He mittui hi lungngaih vanga luangchhuak a ni lo. Khaw te tak te Fuentealbilla atanga mipa naupang rawn zichhuak, footballer nih ve ngei tum ruh tlat – thawhrimna, inpekna leh beidawn duhlohna avanga a mangphan thin rama cheng ta mittui a ni a, ka hringnun tan hian he mittui hi a hlu a ni,” tiin lungkuai takin a football zinkawng thenkhat a sawichhuak.
Iniesta hian a career kum 22 chhunga a tam zawk kha Barcelona-ah a hmangral a, Barca football zirna hmun hmingthang La Masia academy-a zirchhuak zinga langsar ber berte zingah a tel.
Kum 2002 khan Catalan team-ah chuan senior debut a nghakchhuak a, kha mi hnu khan hnungtawlh zawngin a kal ngai ta lo a tih theih a, a kumte a lo tam ve tak hnu kum 2018-a Japanese club Vissel Kobe a zawm khan Barcelona tan trophy 29 tehreng a lo lakpui tling reng tawh a, chu’ng zinga pakua chu La Liga title ni thawtin, pali zet chu Champions Leagues lallukhum a ni bawk!
Kobe-ah khan a han khawsa vang vang a, chu ta tangin United Arab Emirates lamah kum 2023 khan a insawn a, UAE Pro League club Emirates a zawm.
Kum 2010 Ballon d’Or dawng tur thlannaah khan runner-up niin, kum 2009 leh 2017 inkar khan a zawn zatin kum kaw chhung Fifa Fifpro World 11-ah a hming a lang bawk.
Iniesta thlahtu lian Messi
Andres Iniesta chawl ta chuan uitu leh thlahtu pawh a nei hraw na rawh a; hun kha leh chen lehlam pawl goal bula a goal thun tur chhawpsaktu lian ni thinin football a chawlhsan thu a puan hnu lawkah Lionel Messi chuan a Barca team-mate hlui thlahna thu lungkuai zetin heti hian a ziak a:
“Ka team-mate zinga thilmak ti thei, khelhpui nuam berte zinga mi a ni. Kan ball chhuih thin hian a ngai hle dawn che a, chutiang bawkin keini pawhin kan ngai vawng vawng dawn che a ni.
“A tha ber tawngbaw zel turin ka duhsak che a, mi bik i ni,” tiin Instagram story a dahchhuak.
He legendary Iniesta hi Spanish jersey ha tawhte zinga midfielder ropui berte zinga pakhat a ni a; Barcelona pawhin nimin khan social media lamah thlahna thu tarchhuak ve tawhin, “I football hnutchhiah kha a nung reng taw ang,” tiin.
Messi leh Iniesta hian kum 2005 atanga 2018 chhung khan Barca dressing room an hmang dun a; an khelhdun chhung khan La Liga title pakua, Champions League trophy pali lain, kum 2009 leh 2015 khan Nou Camp club chu treble champion an nihpui bawk.