Spanish court-in kiss thubuaiah hremna tarchhuak

Spain High Court chuan Sydney khawpuia 2023 Women’s World Cup awards ceremony-a infawh thubuai chu a rel zo ta a, Ningani khan court thutlukna leh hremna tarchhuakin, Spain soccer federation boss hlui Luis Rubiales chu player Jenni Hermoso remtihna tel loa fawp ngawtah puhin, mipat hmeichhiatna kawnga mawi lo taka che (sexual assault)-ah a ngai a, lung in tantir loin euro 10,000 chuang (USD 10,434) chawi turin a hrem.
A puhtu sawrkar ukil lam chuan kum 47 mi Rubiales hi lung ina nawrluh ngei an duh a, chuti tur chuan court pawh an ngen a, mahse, judge Jose Manuel Fernandez-Prieto chuan sexual assault ni mah se tharum thawhna emaw mi va tihthaih leh vaubeh lam a awm loh avangin sum chawitirah court a duhtawk tih a puang.
Court thuremna ang chuan metre 200 aia hnaiah Rubiales hian Hermoso a hnaih a rem lo a, kum khat chhung chu engti kawng zawng mahin a bepawp thiang lo bawk.
A sum chawi turah hian zangnadawmna atan Spain player Hermoso hi euro 3,000 a pe ang a, hei hi thla 18 chhung nitin euro 20 pein a tlak thei ang.
RFEF federation president hna a chelh lai khan Rubiales hian kum khatat euro 675,762 a hlawh a, a sum hlawhchhuah tawh atangin a thehchhuah ve nual a ngai dawn niin a lang!
He thu buatsaih lai thleng hian Hermoso leh Rubiales-te ukil rawih lam chuan court thuremnaah comment an la tichhuak lo a; a duh chuan Rubiales hian a chunga hremna hi a khinglet thei ang.