‘Speak Now (Taylor’s Version)’-in Spotify record a siam

Pui taka a Eras Tour a kal mup mup a, hetihrual hian Taylor Swift chuan a album thar ‘Speak Now (Taylor’s Version)’ chuan streaming service Spotify-ah record a siam leh ta.
Spotify-in an tarlan dan chuan Swift-i’n 2010-a a album ‘Speak Now’ record tha a, ‘Speak Now (Taylor’s Version)’ ti a a tlangzarh thar leh hian kumin, 2023-a ni khat (darkar 24) chhunga Spotify-a stream nasat ber record a siam. He album hi Zirtawpni kaltaa a tlangzarh kha niin a original album-a hla 16 te a dah leh vek bakah hla thar paruk a dah tel a ni.
‘Speak Now’ album hi a hla hit tak tak ‘Dear John,’ ‘Enchanted,’ leh ‘Back to December’ tih hlate awmna kha a ni. Tuna a album thar hian Spotify history-ah nikhat thil thua country album stream nasat ber record a siam nghal bawk a ni.
Taylor Swift leh ‘Speak Now’ album sawi takah chuan Eras Tour a neih meka Kansas City-a show a neihnaah he album-a hla pakhat ‘Last Kiss’ chu a hla thu a theihnghilh palh a, vawi khat mai pawh ni loin, vawi hnih a theihnghilh lehnghal.
A hla tlar hnih a sak hnuah chang hnihnain a zawm ta daih a, a tihsual a hrechhuak a, “Awi leh, a thu kha…He tour-ah hian dan kan neih chu hla ka sak sual chuan a bul atanga sak that leh tur a ni a, keimah ka inhrem nan. Ka lo phur mah mah a ni. Ka sak that leh in phal em?” a ti a.
Chutah a sa tha leh ta ngei a, tlar thum a sa ta, mahse, a theihnghilh leh tlat, “Awi karei! A ni thei lo, kha kha a hla thu a ni lo em ni. Ka tisual tawh miah lo ang! Awi leh! Hei hi chu ka duh asin maw le. Engatinge he hla hi hetia ka tih a?” a ti leh bawk.