Speaker banglaa thing lian kit DFO hnenah action lak ngen

Tuikhuahtlanga Assembly speaker bangla tualzawla thing lian ho chu tunhnai khan kih a ni a, phalna neia kih a ni loa hria in e Center for Economic and Social Justice (CESJ) chuan Aizawl Divisional Forest Officer hnenah action la turin an ngen.
Environment humhalh lama hma latu CESJ chuan, tunlai khawvelah environment pawimawh zia leh thing leh mau humhalh pawimawhna nasa taka awareness kalpui leh mitinin a pawimawh zia kan hriat thar mek lai a, a humhalh leh venhim kawnga uar zawka hma la tur ber sawrkarin, sawrkar hmun pawimawha thing an kih tir mai chu dan palzutna leh zawmlohna lian takah an ngai tih a sawi.
‘Thingkung hi mihring tana hnawksak leh hlauhawm a awm ve thei. Mizoram sawrkarin hetiang thing kih dan tur hi a duang fel hle a, forest land leh non forest land ami kih dan tur bakah Municipal huamchhunga thing kih theih dan pawh a hranpa ngatin dan siam a ni. Heng, Mizoram Assembly dan siamte hi larsap hriatpuina thlapin gazette-ah pawh tih chhuah a ni. Hetiang a nih laia Mizoram Assembly speaker chenna, a private in pawh ni lo kawta dan bawhchhiaa thing an kit hi thil dik lo tawp a ni a, sawi mam tum chi ah kan ngailo,’ a ti.
Mipui leh sawrkar department-te pawh ‘tree felling guidelines’ bawhchhiat avanga hrem thin an nih lai a, hetianga dan bawhchhiatna thlenna hmun hi a dan siamtute zingah pawh an speaker quarter kawt a ni lehzel chu, dan pawisak lohna lian takah CESJ chuan a ngai tih sawiin, ‘Ram hruaituten an dan siam an palzut a, mipui hremna atan chauh hman an tum a nih chuan a fel lo hle ang,’ a ti.
Hengte vang hian CESJ chuan June 4 khan DFO Aizawl hnehah hma la tura ngenna an thehlut a. Hmalakna an hmu lo a nih chuan PIL file leh a mawhphurtu EF&CC department khin tel thlenga bawhzui zel an tum tih a sawi.