Lok Sabha Speaker chair bula ‘sengol’ dah chu tun Parliament a opposition leh ruling te inbeihna thlentu niin opposition te chuan democracy-ah a pawimawhna eng nge an tih laiin BJP te chuan Indian culture dah lovah an puh ve thung.
Sengol chungchanga inhnialna hi Samajwadi Party MP RK Chaudhary an Speaker Om Birla hnena lehkha a thawn atanga irhchhuak a ni a. Mohanlalganj MP chuan Sengol chu Constitution copy-a thlak ni se a ti a ni.
“Kan ramin Constitution kan hmang chiah kha democracy bul kan tanna a ni a, Constitution chu a symbol a ni. BJP sorkar kalta khan sengol chu Speaker chair bulah an dah a. Sengol hi Tamil tawnga sceptre (laltiang) tihna a ni a. Rajdand tih pawh lal tiang tihna tho a ni. Lal te hun lai pelh tawh hnuah independent kan ni a. Tunah chuan he rama vote nei thei mipa leh hmeichhia ten an sorkar duh tur an thlang mai a ni. Chuvangin ram hi Constitution hmangin nge Lal tiang hmanga kalpui a nih?” tiin a sawi a. Sengol chu dah bovin Constitution copy-a thlak ni zawk se a ti a ni.
Samajwadi Party chu tun Lok Sabha a party lian ber pathumna nan ni a. Akhilesh Yadav kaihhruaina hnuaiah Uttar Pradesh-ah seat 37 lai an la a ni.
An party MP thusawi chungchangah Yadav chuan, “Sengol dah a nih khan Prime Minister-in kunin chibai a buk a. Mahse, tun tuma thutiam a lak dawn khan kunin chibai a buk theih nghilh daih. Kan MP hian Prime Minister hi a hrilh hre nawn duh a niang,” tiin a sawi.
Senior Congress leader leh MP B Manickam Tagore pawhin Samajwadi MP-in Sengol chungchanga a ngaihdan chu a thlawp thu a sawi a. “Sengol hian Lal nihna a lantir a, Lal hun a tawp tawh. Mipuite democracy leh Constitution zawk lawm tur kan ni,” tiin a sawi.
Chaudhary demand chu RJD MP leh Lalu Prasad Yadav fanu Misa Bharti pawhin thlawpin, “He thil ngiattu hi tupawh ni se, a tha ka ti” tiin a sawi.
Opposition tena Sengol chungchanga ngaihdan an neih chu INDIA bloc tena Narendra modi sorkar term thumna nawr nana Constitution an behchhan zel kalpuina ni bawka ngaih a ni a. Tun session-ah pawh a tir phat atangin Constitution chuan a lailum Opposition inhmuhkhawmna reng rengah a luah zel a.
Session tan ni pawh khan INDIA top leader te Sonia Gandhi, Mallikarjun Kharge, Rahul Gandhi leh Akhilesh Yadav te chuan Parliament premises ah Constitution bu kengin lungawilohna an lantir a. INDIA MP zingah Rahul Gandhi leh Yadav te pawhin thutiam an lak laiin Constitution copy an keng tel bawk.
BJP te chuan Sengol chungchangah opposition te chu bei letin, “Samajwadi Party hian a hmain Ramcharimanas an bei tawh a, tunah Sengol an bei leh a, Sengol hi Indian culture a bikin Tamil culture-a bet a ni. DMK te hian Sengol hmuhsitna hi chhang rawh se,” an ti.
Speaker chair bula ‘sengol’ aiah Constitution copy zawk dah ngiat
Get real time updates directly on you device, subscribe now.