Chief minister Lalduhoma chuan state dang aia kilkhawr leh thil man to falna Mizoram tan sawrkar laipui hotute hnenah ‘special package’ a dil a. Covid hun laia Mizoram sum dawn tur centre-in a la pek lohte chu pe turin a dil bawk.Union Finance minister Nirmala Sitharaman kaihhruaiin state leh union territory zawng zawnga Finance minister-te chuan Inrinni khan New Delhi ah Pre Budget Meeting an nei a. Mizoram finance minister ni bawk Lalduhoma hi telin thu a sawi a. Mizoramin hun rei tak rambuai a tawrh avangin hmasawnna hnathawh a hmu tlai bik a. 5th Five Year Plan atang khan mumalin an kal ve chauh tih a sawi a. Hei vang hian state dangte dinhmuna ding ve phak turin sum leh pai mamawhna a sang a, sum mamawhte mahnia thawk chhuak turin state dangte angin industry tihtham kan neih bawk si loa, ngaihtuah kan ngai hle, tiin a sawi.
“State ralmuang tak ni tawh mah ila, kan thenawm state-te leh rama harsatna thleng avangin min rawn bela rawn lut kan ngah hle a, kan tan phurrit a tling. Security Related Expenditure (SRE) hi sawrkar laipuiin min pek ve loh laiin kan thenawm state leh ram atanga hel (insurgent group) pawlte laka invenhim ve reng kan ngai a. Peace dividend siamsak kan mamawh a ni,” a ti.
A kaihhruai sawrkar chu Mizorama ‘change’ thlentir tum tlat an ni a. Chumi atana an mamawh hmasa chu sum leh pai tam zawk a nih avangin 2024- 2025 budget ah sum tam zawk pe turin sawrkar laipui a ngen tih Lalduhoma hian a sawi.
15th Finance Commission khan Mizoram tan special crant cheng vaibelchhe 546 ruahman ni mah se, hei hi an la dawng kim lo nasa a. 2019- 2020 leh 2020-2021 budget a share of taxes atanga Mizoram dawn tur vbch. 2370.80 an la dawng lo bawk a. Heng sum dawn lohte avanga state leiba (liability) hi tun thlengin an la chhawm a. A chinfelna dap sak thei se an duh hle, tiin centre hotute hi a ngen a ni.
Chief minister hian 14th leh 15th Finance Commission ten rawtna an siam anga professional tax rate ennawn thuai tha a ti a, centrally sponsor scheme sum chu single nodal agency-a pek chhuahna danin Central Treasury Rules a mil zan lo deuh nia a hriat thu a sawi bawk. Mizoram chu ram kilkhawr, nitin mamawh man to fal bikna a nih avanga ‘special package’ pek a mamawh thu te, exterally aided projects atana sum hmuh theih bithliah chu ennawn deuh thaa a hriat thu leh SASCI sum hman dan tur awlsam deuh zawk duan tha a tih thute a sawi a ni.
Union, state leh UT tin Finance minister te chu, India chu ram intodelh zawk, hmasawnna inkhairual, state tin, hnam tin leh khua leh tui zawng zawng tumah ngaihthah bik awm lohna rama siam tura thawhho puiah Mizoram chief minister hian a sawm bawk.
Special package kan mamawh – CM Mizoram sum dawn tur la pek lohte dil
Get real time updates directly on you device, subscribe now.
Next Post