Special School tlawh

Congress party hotute chuan Ningani khan vohbik naupangte school, Republic Venga Shining Star Special School an tlawh.
MPCC president Lalsawta chuan, mihringte hi Pathian mithmuhah chuan angkhat leh thuhmun vek kan ni a, danglamna kan awm lo, tiin, rualbanlote enkawl that an pawimawh zia leh an tana zirna school leh infrastructure tha neih a pawimawh thu a sawi.
MPCC treasurer Dr Lalmalsawma Nghaka chuan rualbanlote enkawlna hmun leh zirna school Mizoramin a mamawh takzet tih sawiin, social security tha tak neih a tul tih a sawi. Chhungkaw tam tak tan inenkawl a harsa a, rilru leh taksa enkawl chungchangah nu leh pa, zirtirtute tan a hautak hle tih sawiin, rualbanlote chu mahni kea ding a, intodelh a, eizawng thei khawpa chher theih an ni tiin a sawi.
Shining Star Special School Republic Veng ami hi mi tlawmngai intelkhawm ‘Society For Rehabilitation for Persons with Disabilities’ din a ni a. Kum 2019 khan firms and society leh Social Welfare department-ah registration tih a ni. School naupang 32 neiin zirtirtu 6 an awm. A changin volunteer-te puihna an dawng thin a, mi inphalte pek rin chang an nei bawk.