Spider-Man: Brand New Day-in $1B la lut der tawh

Spider-Man film thar “Spider-Man: Brand New Day” chu cinema hall-a an chhuah tan atanga ni ruk chhung lekin cinema hall ticket hralhna atangin dollar tluklehdingawn a la lut hman a, film tlangzarh tawh zinga hetiang zat sum la lut rang ber dawttu a la ni.
Tom Holland leh a nupui Zendaya te channa Spider-Man film thar hian dollar tluklehdingawn lak luh ranah 2019-a superero film dang “Avengers: Endgame” chiah a pha lo a, he film hian a opening weekend-ah khawvel huapin cinema hall ticket hralhna atangin dollar tluklehdingawn 1.2 a la lut thei.
Brand New Day hi weekend kaltaa tlangzarh kha niin, an tlangzarh atanga ni li chhungin US-ah dollar maktaduai 407 a la lut hman a, US-ah cinema hall ticket hralhna atanga dollar maktaduai 400 chin pel rang thei ber record a siam a, Thawhtanni khan dollar maktaduai 47 la lutin, US-a Thawhtanni a cinema hall ticket hralhna atanga sum la lut tam ber record a la ni. He film hian US pawn lamah dollar maktaduai 645.8 a la lut tling tawh bawk.
Spider-Man film thar hi tuna a ticket sales en chuan a sum lak lu tur hi a pui tham dawn viau a, harsa vak lovin dollar tluklehdingawn hnih chu a la lut thuai dawn niin an chhut a, film tlangzarh tawh zingah hetiang zat sum la lut thei hi pasarih chiah (“Avatar,” “Avengers: Endgame,” “Avatar: The Way of Water,” “Titanic,” “Ne Zha 2,” “Star Wars: The Force Awakens” leh “Avengers: Infinity War”) a la awm a, Brand New Day hi a pariatna a ni thei ngei dawn e.