Sports Centre sak thar hawng

Sports Centre sak thar hawng
Urban Development & Poverty Alleviation Department hmalaknaa sak thar, Chawnpui Veng-a Sports Centre chu Ningani khan UD&PA minister K Sapdanga’n a hawng.
Sports Centre sak thar a nih theihnana tha leh zung thawhtu – bialtu MLA TBC Lalvenchhunga, khawtlang hruaitute, contractor, Sports minister leh sawrkar hmasaten hma an lo lak tawhna fakin, thawhhona tha tak a awm avanga puitlin theih a ni tih a sawi. Mizoramah sports infrastracture tha tak tak kan nei tawh a, sawrkarin thalaite chu naupang an nih lai atanga mumal taka zirtir chhoh tumin Empowering Mizoram Sports kalpui tan a ni a, Chawnpui Sports Centre pawhin tuna atang reiloteah state tihmingthatu thalai engemawzat a chherchhuah a beisei tih a sawi a ni.
Chawnpui Sports Centre sak tharna atan hian cheng vaibelchhe 3.83 ruahman a ni a, SASCI atangin vbch. 3 hmuh niin, state sawrkar sum atangin nuai 83.37 hmuh a ni. Contractor atan M/s Zothan Consultancy Services Luangmual Aizawl rawih a ni a, May 2023-a sa tanin, kumin October-a sak zawh a ni. Chhawng 6-a sang a ni a, lir a nghin palh pawha tlu chhe mai mai lo tura duan a ni.