Sports leh tourism hmasawnna atana ADB puih theihna zawng

Sports leh tourism hmasawnna
atana ADB puih theihna zawng
Tourism leh Sports & Youth Services minister Lalnghinglova Hmar chuan Thawhtanni khan New Delhi-ah Asian Development Bank hotute a kawm a. Sports leh tourism hmasawnna atana tanpuina awm thei a sawipui hnu ah Finance ministry lam a kawm bawk.
India rama ADB hotu lu, country director Mio Oka hoin minister hi an lo dawngsawng a. Mizorama tourism lama hmasawnna thleng mek thantir zel tur leh tourist thahnem zawk dawngsawng thei turin state budget ringawt a tawk lo tih hrilhin, externally aided project kaltlanga ADB atanga loan mamawh a nih dan a sawi.
“Kan khawpui ber Aizawl hi khualzin tana zan thum chamna daiha siam hi kan thupui pakhat a ni a; chutihlaiin thingtlang lamah eco tourism kalpui a, khawtlang nen tangtlanga community based tourism kalpui hi kan thupui a ni bawk. Wildlife tourism kalpui turin Environment Forest & CC department nen pawh thawhhona kan ziak tawh a ni,” a ti.
Sports minister ni bawk Lalnghinglova chuan, sports chu intihhlimna satliah ni loin, tunah chuan eizawnna a ni a, India sawrkar pawhin a dah pawimawh tawh hle tih a sawi a. Infrastructure piah lama infiammite tihmasawn tura man power development lama kal nat an duh a, ADB puihna an mamawh hle tih a sawi.
ADB hotunu hian Mizoram sawrkar inhawnna lawmawm a tih thu sawiin, tunhma deuha dilna an thehluh an lo hnawl tawh chu urban development project an neih mek nen kaikawpa a hranpaa kalpui dan an ngaihtuah tur thu a sawi a. Finance ministry lamah bawhzui a tum tih a sawi a ni.
Minister hian Finance ministry Department of Economic Affairs joint secretary (ADB changtu) Baldeo Purushartha a kawm nghal a,.ADB lama EAP kaltlanga loan dilna awm mek a sawipui. Joint secretary hian ADB nen a ranglama an lo sawiho tur thu leh pek ngei a nih theihna turin hma lak a tum thu a lo hrilh a, Mizoramin an hlawkpui tur zawnga project her rem tul a tih thu a sawi.