Sports minister-in Mizote duhsakna a hlan

Sports minister-in Mizote duhsakna a hlan
India mipa football team chuan thla thar June ni 6 khian World Cup qualifying match-ah Kuwait a hmachhawn dawn a, hun rei tak captain hna lo chelh tawh striker Sunil Chhetri international career thlahliamna inkhel ni nghal tur atana player 27 awmna India squad tharah Mizo player pali ngawt telin, chu’ng mite a lawmpui thu leh an kal zelna tur atana duhsakna thu heti ang hian sports minister Lalnghinglova Hmar chuan social media lamah a tarchhuak.
“Indian national team FIFA World Cup qualifier khel tura Mizo tlangval pali thlan an ni hi thinlung takin ka lawm a, duhsakna sang ber ka hlan e.
“Kuwait nena FIFA World Cup qualifier khel tur team-ah hian David Lalhlansanga leh Edmund Lalrindikate chu India senior team squad-ah a vawikhatna atan an inlan dawn a, anni pahnih chanchin hian min tilawm takzet a ni.
“Lalchungnunga inhliam pawh a dam leh tawh a, India team-ah a kir leh nghal a; Lallianzuala Chhangtein a ho dawn a; Mizo tlangval palite, in chhuanawm a, in hnungzuitu an pung zel ang tih pawh ka ring.
“Ram khat World Cup squad-a state tereuhte aTanga player pali thawh hi thil awlsam a ni lo a, India leh Mizoram tihmingthatu lo ni zel rawh u,” tiin.
Kolkata inkhel pawimawha Arab team hmachhawn tur India squad zinga player langsar pahnih forward Parthib Gogoi leh defender Muhammad Hammad-te chu hliam avanga lang ta lo an ni a; a tirah head coach Igor Stimac hoin player 23-te chuan Bhubaneswar-ah training camp an zawm phawt a, an zing aTang hian player pang – Phurba Lachenpa, Parthib, Imran Khan, Hammad leh Jithin MS-te chu camp aTanga chuahtir an ni.
Player 27 la bangte hian May ni 29 thleng Bhubaneswar-ah training an chhunzawm ang a, June ni 6 khian Kolkata khuaa Vivekananda Yuba Bharati Krirangan stadium-ah Kuwait an hmachhawn dawn a ni.
Blue Tigers hian Kuwait zawhah June ni 11 khian Arab team dang Qatar an luhkhung zui leh ang a, Group A lama an match khelh tur an zo fel tawh ang.
Tun dinhmunah India hian khelh li aTanga point li hmuin an group-ah pahnihna dinhmun an luah mek a, game hnih hmabak an la neih an tlingtlak hnua pahnihna an nih zui theih chuan FIFA World Cup Qualifiers Round 3 an lut pha chiah ang a, AFC Asian Cup Saudi Arabia 2027 khel turin an tling nghal bawk ang.
FIFA World Cup qualifier-a an group-a a sang pahnihte hi round thumna lut chho tur an ni.
Tarlan tawh angin, kum 39 mi Chhetri chuan tun May ni 17 khan international football a chawlhsan ve tawh tur thu hi puangin, kan hma lawka Kuwait an hmachhawn tur hi ram tana a inlan tawpna tur a nih thu a sawi a, chuvangin Kolkata inkhel hi India captain mai bakah Indian football tan pawh inkhel pawimawh leh ngaihven hlawh a ni dawn a, World Cup qualifier kal laiah Blue Tigers tana chak ngei ngei ngaihna inkhel a ni bawk ang.
Top scorer nia India tana goal 94 khung tling tawh Delhi tlangval Sunil Chhetri hian ram tana kum 19 zet a lo beih tawhna chawlhsan hun ni ve tawhin a ngai a, Kuwait a hmachhawn leh hunah India tana khel hnem ber a nihna belhchhahin international match 151 khel tling chungin a chawl ve tawh dawn a ni.
Tun dinhmunah India captain Chhetri hi ram tana inkhelh la chawlhsan lo (active player) zinga goal khung hnem pathumna ni mekin, Portugal captain Cristiano Ronaldo lehArgentina captain Lionel Messi chiah phak loh a nei a; chawl tawhte nen veka chhiar pawhin international goal-scorer list-ah palina a ni phak!

India squad
Goalkeepers: Gurpreet Singh Sandhu, Amrinder Singh, Vishal Kaith.
Defenders: Amey Ranawade, Anwar Ali, Jay Gupta, Lalchungnunga, Mehtab Singh, Narender, Nikhil Poojary, Rahul Bheke, Subhasish Bose.
Midfielders: Anirudh Thapa, Brandon Fernandes, Edmund Lalrindika, Jeakson Singh Thounaojam, Lallianzuala Chhangte, Liston Colaco, Mahesh Singh Naorem, Nandhakumar Sekar, Sahal Abdul Samad, Suresh Singh Wangjam.
Forwards: David Lalhlansanga, Manvir Singh, Rahim Ali, Sunil Chhetri, Vikram Partap Singh.