Euro 2024 zawha chawlh tum Giroud

Kum 25 mi a nih lai kum 2011-a ram tana inlan Tan France forward Olivier Giroud chuan kumin European Championship zawh ruala international duty chawlhsan ve tawh a tum thu a puang.
AC Milan striker hian ram tan match 131 aTanga goal 57 thun tling tawhin France all-time top scorer a ni mek a, kum 2018 World Cup-ah a ram a champion-pui bawk.
Arsenal leh Chelsea forward hlui hi tunah kum 37 mi lai ni ve tawh mah se France head coach Didier Deschamps chuan thla thar Germany ram tournament lian khel tur squad koh hmasak (provisional squad)-ah a la telh fan a, la thlitfim leh tur squad-ah a lang pha dawn em la chiang lo mah se Euro 2024 khelh tinzawn chungin he tournmanent zawh ruala ram tana inkhelh bansan a tum thu a puang a, Deschamps tan pawh Germany hruai thlen chu tih awm tak a nih duh hmel!
Tunhnaia French chanchinbu lian L’Equipe lamin an kawmnaah Giroud chuan a hmalam hun sawiin, “Tun hi Les Bleus behchhana ka competition hnuhnungber a ni ve tawh ang.
“|hangthar lo chhuak zelte tan kawng kan ken a ngai a, chumi piahlamah season khata phur tihrit lutuk pawh a rem lo chho ve ta bawk a, a inbuktawk kan zawn chhoh ve a lo ngai ta a ni,” a ti.
Russia rama 2018 World Cup-ah khan France tan match ruk khel bawk mah se minute 465 chhung khan Giroud hian goal a khung lo mai ni loin target fuh hrim hrima shot pawh a nei lo a; Qatar rama 2022 World Cup final an luh Tum erawh kha chuan goal li khungin, chu’ng zingah chuan quarter-final hun tawp dawna England an hnehna goal pawimawh telin, final penalty petah Argentina an ngam ta lo a nih kha.
Inrinni hian Serie A season a tawp fel ve tawh dawn a, Milan-in table mawngphah luahtu Salernitana an mikhual hunah Giroud hi inlan tura beisei a ni.
Thla thar nipui insuan hunah San Siro-a Giroud contract neih lai hi a zo dawn a, Euro 2024 zawh rualin American Major League Soccer side Los Angeles FC a zawm dawn a ni.
American club nen hian thla 18 daih inremna an ziak fel tawh a, chumi bakah kum khat dang la cham belh leh theihna bilh tel a ni.