Spurs goalkeeper thar Kinsky

Premier League-ah hian Czech goalkeeper ropui kan lo hmu tawh a, tunah Chelsea leh Arsenal goal-veng hlui Petr Cech hnungzui turin Czech keeper dang Antonin Kinsky chuan Slavia Prague atangin London club dang Tottenham Hotspurs a zawm ve leh ta.
Tun season kal laia Prague tana Europa League lo khel hman tawh Antonin Kinsky hi White Hart Lane club chuan pound maktaduai 12.5-in an senglut a; kum 2031 thleng daih tur inremna ziakin, tunah hian England-a hna thawk thei turin international clearance leh work permit a nghak mek a ni.
Tottenham first-choice keeper Guglielmo Vicario chuan nikum November ni 24-a sili faia Manchester City an sawp tum khan a kheimit a tina a, kha ta tang khan tun thlengin a la inkhel leh thei ta rih lo a, goal-a an indaihlohna phuhru turin Czech goalkeeper kum 21 mi an senglut ta a ni.
Vicario theih loh hlanin Spurs chuan first choice atan Fraser Forster an hmang a, mahse, karliamta Inrinnia 2-1-a Newcastle an hneh loh tum khan damlohna avangin goal a veng thei lo a, kum 25-a upa Brandon Austin chuan north London club tana a game hmasaber a khelh theih phah.
Spurs hi an game khelh hnuhnung 11-ah vawihnih chiah chakin Premier League table-ah 12-na an ni pha chauh tawh.
Tuna an keeper thar lei Antonin Kinsky hian kum 2021 khan Dukla Prague atangin an ram khawpui club dang Slavia a zawm a, hmun nghet a chan hmain club dangah loan-in an chhuahtir fo a ni.
Czech Republic Under-21 player hian tun season kal laiah Slavia tan goal vawi 29 veng tawhin, tah chuan match 14 chhung goal chhuah loh a nei.