Srinagar-in kum 57 hnua May thla lum ber tawng

Srinagar-in kum 57 hnua May thla lum ber tawng
Kum 60 dawn hnuah Jammu & Kashmir-a Srinagar khawpui chuan May thlaa a lum ber tum a tawng thar a, Ningani khan 34.4°C-a lum a ni tih weather office chuan a sawi.
Heihi kum 57 hnua May thla bika Srinagar a lum ber tum a ni a. Thuneitute chuan May 24, 1968 khan 36.4°C kaiin hei hi a lum ber nia an chhinchhiah a ni.
Ningani kha May thla bika a lum ber pathumna a ni nghal bawk a, May 31, 1956 khan 35°C a lo ni tawh bawk a, hei hi lum lamah a phak lo bawk.
Ningania a lum lai bera a dinhmun kha tun ang huna khaw lum lam chawhrual aiin 9°C vel zetin a lum zawk bawk tih thuneitute chuan an sawi.
Kashmir chhim lam, Anantnag district-a Kokernag khua chu kumin May thlaa Jammu & Kashmir-a a lum ber tum tawngtu niin Ningani vek khan 33.3°C a kai a ni.
Hetih lai hian India ram hmun dangah chuan ruah a sur nasa a, a bikin chhim lam tuipui kamte chu ruah hian a tibuai nasa hle a. India Meteorological Department (IMD) chuan Maharashtra-a tuipui hnaih district – Raigad, Ratnagiri leh Sindhudurg-ah chuan kartawpah pawh ruah a la sur dawn niin a sawi lawk.
IMD hian ruah a tlak tamna hmunah chuan ni khatah mm 115.6 atanga mm 204.4 thleng a sur thei tih an sawi lawk a. A tam vak lohna hmunah pawh mm 64.5 atanga mm 115.5 inkar a tla thei tih an sawi.
Maharashtra bakah hian Ningani leh Zirtawpniah pawh khan West Bengal-a Ganga lui kam, Goa, Andhra Pradesh vaukam leh hmarchhak hmun zau takah ruah a sur bawk.
IMD chuan Nilaini khan Arabian Sea laili chhak lam, Karnataka-Goa tuipui kam hmar lamah thlivir insiamin chak zawkah a insiam mek zel tih an sawi.
Hei vang hian sangha mantute tan khuahkhirhna siamin Arabian Sea khawchhak laili leh hmarchhak lamah May 25-26 hian feh chhuak lo turin an ti a. Hetih hun lai vek hian Somalia vaukam leh Arabian Sea chhimthlang lamah kal lo turin an ti bawk.
Sangha mantute hi Andhra Pradesh vaukam hrul leh Bay of Bengal laili thlang lamah May 21 leh 26 inkarah feh chhuak rih lo tura tih an nitawh bawk.
Khawchin zirtute chuan Arabian Sea-a thlivir hi ngun taka thlithlai a nih thu leh cyclone insiam a la awm rih lo va, depression-ah erawh insiam thei niin boruak nekna leh tuipui awm dan azirin cyclonic storm-a chang thei erawh a ni tih an sawi.