Stamps & Registration…
Nimin khan land revenue & settlement minister Pu B.Lalchhanzova chuan press conference neiin LR&S department hmalakna hrang hrang a tarlang a, LR&S-in hmasawnna duhawm tak a nei chho mek niin a lang a, a lawmawm hle.
Hmasawnna kan hmuh zinga pawimawh em em, mahse mipuiin kan hmelhriat langsar lo tak, sawrkar pawhin a nihna tur anga a la chhawr tangkai thin loh pakhat chu ‘Stamp Duty & Registration’ hi a ni awm e.
Stamps & Registration hi state dangte chuan sum hnar tha bera an neih a ni a, Mizoram hian a nih dan tur angin kan la chhawr tangkai lutuk lo niin a lang. State Assembly-ah te pawh auchhuahpui a lo ni zauh zauh tawh a, mahse ‘state sum hnar tha tak’ ang chuan kan la chhuah thei meuh thin lo.
Kan hriat angin, Mizoram sum hnar lian bera ngaih GST hi chu sawrkar laipui nena insem a ngai a, Stamps and Registration erawh state chanpual liau liau, state sum bawma lut tur liau liau a ni a, a rate, fees, engkim state-in a duh ang anga a rel theih a ni a, fet (strict) deuh zawka sawrkarin a kalpui theih chuan, state sum hnar tha tak a ni dawn a ni.
Kum li kalta chhunga Stamps & Registration atanga Mizoram sum hmuh pun dan atang hian hma kan sawn dan a lang a. Kum 2022-23 chhunga sum hmuh cheng vaibelchhe 7.9 a nih laiin, a kum leh 2023-24 ah chuan cheng vbch 8.3 a ni a; 2024-25-ah chuan cheng vbch 13.54 niin, 2025-26-ah chuan cheng vbch 20.2 a tling a. Kum 2024-25 leh 2025-26 chhunga sum hmuh a san dawrhna chhan hi The Indian Stamp (Mizoram Amendment) Bill, 2024 passed a nih tak avangin, March 2024 atanga Stamp Duty rate 3%-a tihpun a nih tak vang kha a nih a rinawm. A kum leh 2025-26-ah hi chuan thla 12 chhung rate thar anga lak a nih tak avangin Vbch 20.2 a ni ta dawrh a, a hma kum aiin 49% dawnin a tam zawk ta a ni. Registation fee erawh 1% lak a la ni awm e.
Mizoram sorkarin revenue administration changtlung zawk neih tuma hma a lakna hian state sum bothlau thei tur tam tak a hum thei dawn niin a lang a; minister leh department thawktute thawhrimna a fakawmin hei hian state dinhmun nasa takin a chawikang thei dawn niin a lang a, a lawmawm hle a ni.