Mizoram Legislative Assembly-in kum 2023-a dodala a lo hnawl tawh Forest Conservation (Amendment) Act 2023 chu Nilaini khan House-ah putluh a ni a, hman ve tura pawm (adopt) a ni.
Parliament-in Forest Conservation Act 1980 thlakna atana Forest Conservation (Amendment) Bill 2023 a lo pawm tawh, a hnua Act ni ta hi kum 2023 vek August thlaa Mizoram Assembly thutkhawmah hetihlaia Forest minister chuan Mizoram tan a him lo nia sawiin dodalna resolution a pulut a, hemi tum hian opposition leh treasury bench-in lungrual takin he dan hman loh turin resolution hi an pawm a, dan siamthat hi hman a ni ta lo.
Nilainia Assembly Session-ah Environment Forest & CC minister Lalthansanga chuan Mizoram-a Forest Conservation (Amendment) Act 2023 hman ve tawh turin official resolution a pulut ve leh a. He Act hi India danpui article 371G hnuaiah Mizoram state-in a hnawl theih a nih avanga hnawl a nih tawh laiin, Central Acts hi article 371G hi hman theih a nih loh avang leh, ram venhimna thila pawimawhna hrang hrang avang leh, ramngaw leh bio diversity humhalh chunga hmasawnna hnathawhna atan hman tul a nih avanga he dan hi hman tul a ni tih a sawi a ni.
Leader of opposition Lalchhandama Ralte chuan he dan hi State Assembly-in a lo dodal tawh leh hman loh tura a lo hnawl tawh a ni a. Chumi tuma opposition leader, tuna House leader ni mek pawh a dodal zawnga sawi uar ber pawl a ni tih a sawi. A that chhan an sawifiah zawh a, eptu member-te an hmin chuan an pawmpui theih laiin, kum hnih awrh chauh a liam hnua, tha ber anga sawi a ni leh ta chu a phenah chhan a awm thei em, tiin a zawt a ni.
MNF member Robert Romawia Royte pawhin, he dan hi hmang mai loa, a kaihhnawih pawl leh environment activist, kohhran thleng pawha inrawn hmasak ngai a nih avangin tun Session-ah chuan pass loh nise tih a rawt.
House leader Lalduhoma chuan kum 2023-a an sawiho dana a tanna sawi pahin, hemi tum hian Mizoram tan a hlauhawm dan pawh hrechiang kim loin, a hlauhawm thei dawna an hriat avanga dodal an ni tih a sawi. Kum 1980-a siam he dan hmasa pawh Mizoram-in a lo hman reng tawh a nih avangin a dan siamthatna chu article 371G hmanga lo dodal theih a ni em, tihte an zirchiang a; he dan notification a chhuah hnu kum 2023 vek hian Mizoram sawrkar hotuten an zirchiang a, lo dodal chi a ni lo tih hmuh chian a ni a, hei hi sawrkar hmasa hunlaia hriatchhuah tawh a ni tih a sawi.
“Sawrkar hmasain umzui tlaka a ngaih loh kha kan han zirchiang ve ta a, notification, amendment rules, guidelines, ngun taka kan thlirin, pawm theihah kan ngai a; a tha thar thut kan ti loa, a pawm theih mai lo maw le, kan ti deuh chauh a, kan duhthu a sam bik lo,” a ti. Forest chungchangah Supreme Court a khauh a, he dan hian a rawn pawlhdal viau zawk tih a sawi a. State leh UT tan he dan thar hian thuneihna sang zawk a pe thei bawk tih sawiin, a tul a nih chuan State Assembly bawk chu paiha dodal leh theitu a ni tih a sawi.