North Eastern Council Golden Jubilee lawmna kal mekah Thawhlehni khan Aizawlah hun hman a ni a. He hun hmanpuitu chief minister chuan, Mizoram chu hmarchhak state zinga state lian leh mipui tamna ber ni lo mah se, entawntlakin kan siam thei, tiin a sawi a. Mizoram chu lehkhathiam rual awmkhawmna, khawtlang inpumkhat leh tanrualna ram a nih angin, state dangte tan rinawmna leh inhmangaihna kawngah te, tlawmngaihnaah te entawn tur awmna a ni, tiin a sawi a ni.
-- Advertisement --
India hmarchhak state-te hi state hnufual tak tak kan nih hlawm avangin hmasawnna kawngah a bika dawmkan ngai dinhmunah kan ding a, sawrkar laipui chuan ruahmanna siamin, sawrkar laipui hnuaia ministry hrang hrang (tunah chuan ministry 52) te chu an anual Plan Budget atanga 10% chu India hmarchhak state-te hmasawnna hna thawhna atan dah hrang turin a ti a. Hei hi kum 1996 atanga kalpui kha niin, central ministry hrang hrangin NER atana 10% diat diat an dahkhawm hi cheng vaibelchhe sangthum chuangte a ni thei a, chu chu India hmarchhak state 8 te hian kan mamawh dan ang zelin kan lo insem ta thin a ni.
Central scheme tha tak tak bakah DoNER hnuaia hmasawnna sum kan dawn theihte hmang ringawt pawh hian, Mizoram ram zimtê, mihring tlemtê awmna ni si hi chu state dangte entawntlak kan ni thei; mahse, ‘ni thei’ hi kan la ni lo nasa mai si a, eng ber hi nge kan mutan ni ta ang tih hi zawhna pawimawh tak a ni awm e.
State entawntlak nih theihnate hi social aspects lam atanga teh chuan, state dangin an neih ve lem loh heng inpumkhatna te, tanrualna leh tlawmngaihna te hi kan neih that avangin state dangte tan chuan entawntlak kan ni sa tawh, tiin sawi ta ila, kan sawi sual tam lo maithei e. Mahse, chutih rualin ram hmasawnna lam thil heng ei leh bara intodelhna lam leh infrastructure development lamah potential kan nei that ang hu hian state dangte hnungah hian kan la su laih laih reng mai niin a lang a. Potential kan nei tha kan tihna hi a rei ta hle mai a; “potential neih that chhawr tangkai state entawntlak” ni thei tura tan lak lai tak hi kan hmabak chu niin a lang.