State dang pawhin an tih theih chuan…

Sawrkar thar nei turin Mizoram a insingsa mek a. Naktuk mai hian Chief Minister leh Council of Ministers te lakluh a ni tawh dawn a; Mizoram sawrkar thar a piang dawn ta a ni.
Tun tum sawrkar thar hi chu, tunhmaa ‘sawrkar thar’ tia sawi thin, mahse sawrkarna fawng chelhtu a mihringa te a ngai ngai ni leh deuh vek zel thin ang kha ni tawh lovin, tun sawrkar tharah hi chuan, tunhmaa sawrkara la tel ngai lo thah, a thar hlak vek an ni dawn a. Chu mai pawh a la ni lova, tum khata party pakhat atanga ‘first timer’ tlin tam ber tum tia sawi theih hial a ni bawk, sawrkar tharah pawh thar tak a ni.
Hei hi sawrkar thar dinhmun tur a nih avang hian engkim mai deuhthaw hi ‘sawrkar hmasate aia thain aw’ tih theihna remchang/chance tha tak hi a ni thei zel mai dawn niin a lang a; a lehlamah chuan sawrkar thar tur tan pawh hian a phurawm hle ang tih a rinawm.
Mipuiin state dang hmasawn dan an hmuha an hriatin an awh thu an sawi thin a. Kan thenawm lawk Tripura chief minister ni thin Mani Sarkar hming pawh kan hre bel hle hman a. Eiruk hluarna nia sawi thin Bihar pawh, an chief minister hmingin lamrik a hlawh a; Mizoram politics veitu kan sakhaw rawngbawltu mi challang tak takte thlengin Nitish Kumar-a hming an lam awl lova. Kejriwal-a hming phei chu naupang te te pawhin an hre bel viau tawh a nih hi. Eng vanga heng state dangte chief minister hming hi lam ri thin nge kan nih kan tih chuan, tunhmaa dinhmun chhe tak leh hniam tak atanga dinhmun tha zawka hlangkai theitute an nih vang a ni.
Tun hnaia VUC Member Pu Bualhranga’n, ‘State dangte pawhin an tih theih chuan, keini Vanapa thlahte pawhin kan tih ve theih lohna tur a awm lo’ tia a sawi ang hian, chief minister hming ringawt atang pawha state hming hriat nghal hliah hliah theih turin sawrkar thar hian hma han la tak tak teh se.