L Sailo
-- Advertisement --
Tunah chuan 2023 MLA inthlan kan lo zo ta a. Kan mi thlan tlin thar, mi 40-te pawhin kan state kaihhruai leh enkawl hna an thawk tan thuai tawh ang. An thawh tur chu kan ram Constitution tlawhchhan zelin, ram dan vawn that leh enkawl-te, a tul anga ram dan siam belh leh siam that hna (Governance)-te a ni phawt ang a. He’ng hnate hi an thawh tan theih nan remchang hmasa berah kan ram Constitution Article 188-nain a phut angin India constitution tana rinawm turin Raj Bhavan-ah thu an tiam dawn a ni. Chumi hnu chuan an MLA dinhmun luahin, MLA hna pawh an thawk thei nghal tawh dawn a. Tichuan anni hi, kan state thuneihna hmun thuma thena hmun khat, Legislature lama hotu leh thuneitu, kan Governor hoin an ni dawn a. An hmunpui pawh Legislative Assembly leh, chumi-in a ken Office leh hmun-te hi an ni.
He’ng kan mi thlan 40-te zinga ngaihdan leh duh dan inang khata tangrual tlang thei (Party-wise tihna a ni ber mai) tin-te chuan, Legislature Party hran theuh an din ang a, hotu an thlang theuh bawk ang a. Chu’ng Legislature Party zinga lian ber, member 20 aia tam nei (tunah chuan ZPM Legislature Party) atanga hotu an thlan chu, Legislative Assembly-a Leader tur a ni nghal ang a. Tin, chu mi chu Executive lamah Chief Minister dinhmun luahtu tur a ni nghal bawk ang. He dinhmun luahtu atan hian ZPM Party chuan Pu Lalduhawma hi a hma atangin an lo ruat lailawk tawh bawk a ni. Tin, ani hian mipui thlan mi 40 zing atangte hian Legislature lama hotu chan chang tur, Speaker-te, Deputy Speaker-te, Chief Whip leh Deputy Chief Whip-te a la ruat bawk ang.
Tin, amah vek hian, MLA 40 hote zing atangin, kan ram Constitution, Article 164 (1-A)-in a phal angin Executive (ram dan anga a taka state kaihhruai hna) lama a thawhpui tur, amah tiamin mi 12 a thlang chhuak bawk ang a. He’ng mi 12-te hi, kan ram thuneihna hmun thuma thena hmun khat dang, Executive (ram dan anga a taka State kaihhruai hna) lama a thawhpui tur, Minister dinhmun luahtu turte an ni. Executive lama hotu ber chu Governor a ni a, ani hian kan Minister-te thurawn angin hna a thawk ang a. Executive lam hmunpui leh a thawktute awmna chu Secretariat office hi a ni.
Ti hian, mipuite’n kan State kai-hruai tura kan mi thlan mi 40-te bulpui, an hna ber leh an buaipui ber tur chu, Legislature lamah, Constitution behchhan leh tlawhchhan zelin, kan state kaihhruai leh enkawl nan ram dan vawn that leh enkawlte, a tul anga ram dan siam belh leh siam that hna (Governance)-te an ni a. Tin, Executive lamah, a bikin MLA ni chunga Minister ni bawk 12-te chuan, ram dan kengkawha a taka State kaihhruai hna (administration)-te an khawih ber dawn a ni. Minister atana thlante pawh hian mipui hma-ah khun khan leh puithu takin Raj Bhavan-ah, kan ram Constitution Article 164(3)-in a phut angin an hna thawh dan tur atan leh ram an kaihhruai dan tur atan thu an tiam bawk dawn a. An intiamna thu hi Constitution, 3rd Schedule, thren V, VI leh VII (B)-ahte a hmuh theih a. An intiamna thute chu hetiang hi a ni dawn a ni:
(1) State MLA-te intiamna thu:
“I …, having been elected a member of the Legislative Assembly do swear in the name of God / solemnly affirm that I will bear true faith and allegiance to the Constitution of India as by law established, that I will uphold sovereignty and integrity of India and that I will faithfully discharge the duty upon which I am about to enter”
(2) State Minister-te’n an office luah tura an intiamna thu:
“I …, do swear in the name of God/ solemnly affirm that I will bear true faith and allegiance to the Constitution of India as by law established, that I will uphold sovereignty and integrity of India, that I will faithfully and conscientiously discharge the duties as a Minister for the State of Mizoram, and that I will do right to all manner of people in accordance with the Constitution and the law without fear or favour, affection or ill-will”
(3) State Minister-te’n thuruk vawng tura an intiamna thu:
“I …, do swear in the name of God / solemnly affirm that I will not directly or indirectly,communicate or reveal to any person or persons any ma?er which shall be brought under my consideration or shall become known to me as a Minister for the State of Mizoram except as may be required for the due discharge of my duties as such Minister.
An intiamna thu hi heta kan hmuh ang hian, MLA / Minister hna an chelh chhunga India ram tana rinawm tura an intiamna a nih rualin, kan ram dan (Constitution leh a hnuaia dan – laws) ang zela hna an thawh tur leh ram thuruk vawng tura an intiamnate a ni ber a. He thutiam hi Constitution meuhin a phut a nih avangin hei aia puithu leh ngaih pawimawh phu hi kan ram inrelbawlna-ah a awm thei lo a, chumi atan chuan ram leh mipui zawng zawng hma-ah puithu leh urhsun theihtawpa an intiamna a ni reng a ni. Tuna ruahman ang chuan MLA leh Minister-te thutiam (swearing-in ceremony) hi Dec 8 (Friday), dar 11 am-ah, Raj Bhavan lawn-a neih tur a ni.
Heta an thutiam atanga thil chiang chu, kan MLA/Minister-te hi ram an kaihhruai hna kawng tinrengah, tumah hlau lo, duhsak bik leh duhsak loh bik nei loa ram dan (dan rorel – mipui rorel tihna) ang veka thil ti tura intiam an ni, tih hi a ni. He an kalphung tur hi mipuite’n kan ngaih pawimawh em avangin, thlan tlin an nih hnu-ah pawh an duh duh ti thei tura sezawl chhuah ngawt loin, an hna bul an tan hmain ram dan (laws) anga ram kai-hruai turin thu kan tiamtir a ni. He thu an tiam phawt loh chuan thlan tlin pawh ni se MLA an ni thei lo a, Minister an ni thei hek lo. Heta tang hian kan mi thlan tlin MLA/Minister-te hi an duh dan dana ram hruai tur ni lo, hruai dan tur duan sa, ram dan ang zela ram hruai tur an nih a chiang a. He ram dan chhungah zel chauh hian tul leh ngaih pawimawh an tih lam, nawr hmasak leh nawr nat an tumte, tun hma tih dan thlak tul an tihte erawh an nei thei teh meuh ang.
Hei hi thil pawimawh tawp a ni a, mipuite pawhin hei hi tun hma anga, thil nihdan phung pangngai satliah ang ngawta ngai tawh lo a, a tihlawhtling ngei tura kan mi thlante pawh beisei nachang kan hriat a, a tul chuan tihlawhtling tura thunun nachang pawh kan hriat ngei ngei a ngai a ni.
Kan MLA-te leh kan Minister-te’n he an thutiam an hlen ngei hi kan ram tan a pawimawh tawp a, a chhan chu hei hi mipui rorel-in a tak a chan theihna bul a ni tlat a ni. Kan hriat angin ram dan anga ram kaihhruai that a nihna hmunah ram pawi khawihna lian thamin hmun a chang thei lo. Chutih laiin kan rama thil tha lo lian leh ril pui pui, eirukna, chawm hlawm nih leh lei-ba ngah, AIDS, Cancer, retheihna, pi pute nun ze tha leh tlawmngaihna bo zelte, nun pawn lang leh nun tha lote nen, nasa taka a hluar zelzia kan hmu vek thung a. He’ng thil tha lote hi, kan ram hruaitute’n an thutiamte hlen lo a, ram dan ang lo (an duh dan zawk)-a ram an kaihhruai thin vang a ni tih a chiang a ni. An ram kaihhruai kawng engkim, hawina lam apiangah hian, an thutiam phatsan a, ram dan an zawm that loh, bawhchhiat leh hman sual luih hmuh tur a awm tawh thin si a. Kan ram hruaitute’n an thutiam an hlen loh thin hi democracy pawh kan thatpui ve theih lohna bul leh, kan politics pawh a kal sual tanna bul a ni a, kan tun dinhmun tha lo lutuk pawh kan thlen takna chhan hi a ni tlat a ni! Ram tana thil tha lo a thlenna leh a hluarna apiang hi, ram dan zawm loh vang, a nghawng leh a hlet a ni ziah si a.
Tunah pawh kan mi thlan tlinte’n he thutiam hun (swearing-in ceremony) hi an han hmang leh ngei ang a. Mipuite’n a hnua ram tan hma an lakna kawng tin rengah an thutiam angin ram an kai-hruai em tih kan lo én zui ngei tawh ang. Kan mi thlante’n kan thlan chhan ang leh an thutiam anga ram an kaihhruai chuan, kan ramah thil tha lo hluar nasa awm loin hma kan sawn ang a, an thutiam ang loa ram an kaihhruai erawh chuan tun bak hian hma kan sawn ngai lo ang a, kan chhe zual zawk leh ngei ang! Chumi kan pumpelh theih nan chuan, an thutiam anga ram an hruai ngeina turin, mipuite’n a tul phawt chuan kan mi thlante thunun tur thlenga kan inpeih a ngai a ni.