State Food Commission tuai thar

Sawrkarin Mizoram State Food Commission a dinin hma a lak dan tur relin Zirtawpni khan Food, Civil Supplies & Consumers Affairs minister Pu B.Lalchhanzova hoa thutkhawm a ni a. Commission member-te bakah department hotute an tel.
National Food Security Act 2013 chuan state tinah Food Commission din a phut angin Mizoramah pawh 2018 October khan din a ni a. Chhan hrang hrang avangin hun hmasa lam khan Commission hi a nih tur ang a ni phaloa, tih tur ti loin a lo awm tawh thin tih minister hian a sawi. Hei hi ZPM sawrkar chuan siamdik a tum tih a sawi a ni.
Food Commssion-ah member secretary mumal tak ruat awmlo chu siamthat nise, tia sawrkara rawtna thlen tum a ni a. Distrcit level-ah mipuiin NFSA kaihhnawiha buhfai lak leh ration card chungchanga harsatna an neih an thlenna tur District Grievance Redressal officer atan The Mizoram Food Security Rules 2017-in a ruat addittional DC-te chu helam hawia zirtir leh hrilhhriat nise, an ti.
Mipui nawlpuiin buhfai sem, ration card chungchang leh NFSA kaihhnawiha an vuivaina leh hriat duh an thlenna hmun tur an hriat theihnan inzirtirna kalpui uar nise, an ti bawk.
Minister chuan dinhmun harsaten an chanvo ration an chang em, buk dikin an la em, thleibik neiloin ration sem thin a ni em, eirukna engemaw avangin an chanvo chang lo an awm em, a phu ngei hmaih an awm em, tih leh helam kaihhnawih thil chu Food Commision-in a endik tur a ni, tiin, an mawhphurhna hlen chhuaka active taka hna thawk turin a chah. Sawrkar chuan an tha tichak turin a theih angin a pui zel dawn tih a sawi a ni.
State Food Commission-ah chairman hi FCS&CA secretary hlui HL Rochungnunga, IAS (Rtd) a ni a, member dang pathum an awm a ni.