Daily Newspaper

State hlim ber

11

Tun hnaia ‘India Happiness Report’ in a tarlan dan chuan, tehkhawng hrang hrang paruk khaikhawma India rama state hlim ber chu Mizoram a ni. Hei hi nimina World Tourism Day denchhena Mizoram tourism minister-in thuchah a sawinaah tarlangin, ‘Mizoram tan khualzinte hipna hmanraw tangkai tak a ni thei’ tiin a sawi a ni.

India Happiness Report-in tehkhawng (parameters) hrang hrang paruk a hman te hi – (1) family relations and friendship (2) work-related issues – income and growth (3) social issues and philanthropy (4) physical and mental health (5) religion or spiritual affiliation (6) Covid-19’s effect on happiness, te a ni.

Report siamtu hi ‘management strategy expert’ a ni a, survey hi kumin March-July, thla nga chhung neih niin ram pum huapin mi 16,950 atangin he survey hi kalpui a ni. Survey atanga lang pakhat chu, nupui pasal la nei lote aiin nei tawhte an hlim zawk, tih a ni bawk.

Tehkhawng hrang hrang zingah hian, Relationship-a top five indawt dan chu – Mizoram, Andaman and Nicobar Islands, Punjab, Karnataka, leh Sikkim te an ni a. Work related-ah – Assam, Punjab, Andaman and Nicobar Islands, Mizoram, leh Puducherry. Health related-ah Andaman and Nicobar Islands, Lakshadweep, Mizoram, Punjab, leh Sikkim. Philanthropy-ah – Ladakh, Arunachal Pradesh, Andhra Pradesh, Karnataka leh Mizoram. Religion/spiritual orientation-ah Nagaland, Sikkim, Tripura, Andaman and Nicobar Islands leh Ladakh te an ni. Mizoram a lang lo.

Heng tehkhawng zingah hian, Mizote chemkalna pakhat, midang tanpuina lama inhman ‘sem sem dam dam’ kan tih mai, a saptawnga ‘philanthropy’ an tihah hian top five-ah a mawng ber kan ni a. Kan hriat angin, Covid-19 hrileng avanga nunphung a han khaihlak khan, he ‘zia’ hi a langsar hle a, chutih laiin India ram state dang zingah, keini aia philanthropy lama sang zawk hi state pali an la awm a. India rama GDP (2012-18) sang ber Mizoram chu ‘work-related issues – income and growth’ tehkhawngah hian palina kan ni bawk a. India rama GDP sang filawr zual Gujarat, Karnataka, Tripura, Haryana leh Chandigarh te chu he tehkhawngah hian an lang pha lo.

A enga pawh ni se, heng tehkhawng hmanga hun rei lo te chhunga survey neihah hian, ‘state hlim ber’ dinhmuna din hi a ‘hlimawm chiah em?’ tih chu kan inenfiahna tur a nih a rinawm. GDP sang ber kan nih lai hian, kan rama sum leng vel hi kuthnathawktute thawh chhuah atanga awm ni lovin, sawrkar hnathawkte hlawh (budget atanga a lan danin) atanga insiam niin a ngaih theih a. Kan GDP sang hian belhchian a dawl chiah em tih hi inenfiahnan hman a pawimawh bawk ang a. Mi survey result-a ‘hlim’ aiin, keimahni intehnaah, kan hlim chiah em tih hi tehkhawngah kan lo hman ve a ngai awm e.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy